【住家清湯底拉麵榮登米芝蓮 多賀野過江必食醬油味】多賀野拉麵

喺東京有唔少人龍店,以清湯底聞名,仲米登米芝蓮嘅Takano Ramen多賀野拉麵都係其中一間,佢哋首間分店兼海外店上月喺尖沙咀K11 Musea開始試業。總店由一對日本夫婦主理,佢哋將由住家製作嘅清湯底拉麵帶到大家面前,而且呢個住家味道仲攞咗四屆米芝蓮,仲喺日本食評網Tabelog曾經取得3.99高分!依家佢哋嘅招牌麵食嚟到香港,麵款同總店一樣,但加咗飯類、小食同甜品,即刻睇吓有幾正啦!

多賀野拉麵總店負責人高野夫妻對出品好有要求,雖然將湯底同製麵技巧傳授俾香港店兩位師傅,但佢同先生每隔半年都會嚟香港監察品質。

店內環境好有日本風格,仲貼心咁設有屏風間格,為單獨嚟嘅食客增添私人空間。

製麵師傅依家每日約製作兩至三轉麵條,仲時不時拎起麵條度尺,務求保持同日本一樣嘅品質添。

麵嘅密度幾高,但口感仲係彈牙,亦唔會好易發脹。

先試相對淡味啲嘅粟國塩味拉麵(HKD128),湯底好清唔多油,但係用咗日本粟國出產嘅高質鹽嚟烹調,味道其實幾鮮味又唔會死鹹,飲晒都冇問題。

而最招牌梗係多賀野醬油拉麵(HKD128),湯底用上雞肉、雞骨、豬骨、豬軟骨、薑蔥蒜、魚乾等材料熬煮,出餐前再撞落單即煲嘅鰹魚乾精華湯汁,令清湯底都有香濃味鮮嘅效果;配料同粟國塩味拉麵一樣有火炙叉燒、香滑嘅溏心蛋同紫菜。如果想湯底再特別啲,可以將叉燒喺湯浸一陣,會有少少火炙味帶落湯度㗎!

佢哋嘅辣麵同一般嘅濃湯唔同,口味傾向中式少少。芝麻辛辣拉麵(HKD138)味道唔係好辣,加咗芝麻醬汁只係令湯杰啲啲啫,入口依然順滑。配料除咗火炙叉燒,仲有肉粒增加口感。

酸辣擔擔麵(HKD138)係香港大廚鍾意嘅口味,同樣唔係太辣,但酸酸哋嘅味道令人覺得好爽!而且加咗啲炒過嘅榨菜幾特別,配麵或肉一齊食更加爽口添。

豚鴨沾麵(HKD168)嘅湯底用上鴨肉、鴨骨、雞、蜆、菇等材料熬煮再撞鰹魚乾精華湯,只係比醬油味鹹少少,但食完加湯飲埋都唔會太鹹。

沾麵麵條粗啲,但湯底唔係杰身,所以唔會好掛湯。

想試小食的話,不妨點大隻又嫩滑嘅自家製吉列炸蠔(HKD78/3件),或見到一絲絲蟹肉嘅自家製蟹肉薯餅(HKD68/3件)

呢度仲有山形果汁汽酒波子汽水(各HKD48/枝)同果味濃郁嘅雪葩。其中柚子雪葩(HKD68)比較甜啲,菠蘿雪葩(HKD68)就好清新。

 

多賀野拉麵
地址:尖沙咀梳士巴利道18號K11 Musea 2樓220號舖
電話:2881 8331
營業時間:星期一至日:12:00-22:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *