【東涌探Line Friend歎果味下午茶 機場日落秘景+泡泡屋打卡】Local自駕遊

去東涌有咩做?東薈城名店倉擴建之後開幕冇耐,已經多咗好多新店進駐,更有全港首間LINE FRIENDS Store Outlet俾你買平價主題精品;附近嘅酒店又有得食周末限定嘅荔枝番石榴主題自助下午茶;想睇靚景,仲可以兜遠啲去機場維修區或者欣澳秘境添,放假一於揸車入去玩吓啦!

 

全港首間Line Friends Store Outlet

全港首間LINE FRIENDS Store Outlet喺上個月終於開咗喇!話明Outlet就梗係特別多平價嘅精品賣啦,店內有超過一半嘅Brown & Friends精品都以3至7折獨家發售。除咗一般嘅主題精品之外,呢度仲推出大嶼山主題嘅香港限定LINE FRIENDS精品添,各位粉絲一定要去朝聖呀!

 

LINE FRIENDS Store Outlet
地址:東涌達東路18-20號東薈城名店倉419號舖
電話:2987 7597
營業時間:星期一至日:10:30-20:30

 

歎荔枝番石榴主題自助下午茶

行到攰攰哋,不如去食個Tea差吓電啦!諾富特東薈城酒店餐廳Essence近期推出一個以荔枝同番石榴做主題嘅自助下午茶,以呢兩種咁清新、消暑嘅水果創造出一系列鹹點同甜品,有將近50款食物俾你任食。其中不得不試呢度嘅涼拌荔枝火鴨絲、荔枝咕嚕肉,同埋吸睛甜品法式芭菲三重奏。呢個期間限定嘅下午茶好受歡迎㗎,去之前記得book定先喇。

 

Essence 荔枝番石榴週末「夏」午茶
供應日期:即日起逢星期六、日及公眾假期
供應時間:15:00-17:00
價錢:星期六、日:HKD158/位;公眾假期:HKD178/位

諾富特東薈城酒店 Essence
地址:東涌文東路51號
電話:3602 8808
營業時間:星期一至日:06:00-23:00

 

遊車河睇日落(1)機場維修區

由東薈城揸車入機場維修區都只係大約10分鐘車程,揸車入去睇日落,打吓卡都幾有feel喎。不過機場維修區內就冇得泊車嘅,想喺度散步留耐啲,可以搭巴士或者踩單車入去都好方便,附近仲有一大片草地,唔少人都專程入嚟野餐㗎。

近距離睇住飛機升降,又有一望無際嘅海岸線,日落嘅時候仲睇到咁靚嘅鹹蛋黃,喺香港真係冇乜幾可見到㗎!一場嚟到又點可以唔去埋機場維修區長堤呢?呢度都係其中一個必去嘅打卡點,沿路行多十分鐘就到㗎喇。

 

圖片來源:William Lau

 

遊車河睇日落(2)海鳴路+小蠔灣「時光隧道」

如果想去另一個兜風好去處海鳴路,都只係相距東涌市區約15分鐘車程。沿北大嶼山公路一直揸到小豪灣車廠,穿過小豪灣「時光隧道」就會到達呢個欣澳秘境,喺度睇日落都係一個唔錯嘅選擇!

 

圖片來源:IG@holun527

 

Food Opera特色美食任你揀

睇完日落又可以去返東涌市區食餐好嘅。係咪諗住小編介紹Food Court俾大家好行呢?唔好以為Food Court就冇好嘢食呀,東薈城呢間新開嘅食代館主打集體回憶,裝潢行懷舊風格,但食物就一啲都唔輸蝕,連米芝蓮級數都有得食呀!

其中天后站清湯腩嘅大廚曾助陣米芝蓮餐廳,依家自立門戶,仲第一次以Food Court嘅形式俾大家食到,佢哋招牌嘅崩沙腩擔擔麵(HKD57)價錢夠親民,絕對值得一試呀。

 

食代館
地址:東涌達東路18-20號東薈城名店倉7樓704號舖
電話: 2169 0791
營業時間:星期一至日:10:00-22:00

 

Outback露營主題泡泡屋+期間限定澳洲餐

想食豪啲再影多幾張靚相,呢間喺東薈城新開嘅Outback都係一個唔錯嘅晚餐選擇。同其他Outback分店唔同,呢度有3,000呎戶外區,客人可以自由出入、喺度Chill吓。而呢度仲打造咗一個以露營為主題嘅「Outback巨型泡泡屋」,係全港首間㗎,食嘢之餘,記得入去體驗吓呀!

而即日起至11月30日,仲有得食期間限定嘅澳洲套餐添!必食來自澳洲嘅燒全羊架伴特色雞味飯及新鮮時蔬(HKD590)同埋新鮮活藍青口配檸檬牛油香草汁(HKD148)。喺度歎呢個套餐,仲有得俾你玩夾公仔機,帶限量版樹熊公仔返屋企。

 

Outback東薈城店
地址:東涌達東路18-20號東薈城名店倉3樓326B號舖
電話:2109 0668
營業時間:星期一至日:11:30-22:00

You may also like...

Leave a Reply

Your email address will not be published. Required fields are marked *