【素食店DAMA擴充添餐飲 必食純素火龍果雪糕】DAMA

由上環60呎果汁小店,做到依家喺尖沙咀有堂食餐點同甜品,因為大家都鍾意DAMA落足料嘅素食!最近佢嘅純素軟雪糕仲掀起一陣打卡熱潮添,即刻睇吓有幾正啦!

搬舖兼擴充梗係要裝修到靚靚仔仔啦,唔止有藝術feel,仲有打卡牆俾大家影靚相。

話明有餐點,當然有唔少新鮮素材啦,店員只會準備三、四份材料喺櫃,唔夠先再即刻準備以保持食材嘅新鮮度。

Combo Lunch Set(HKD88)可以揀任何一款餅捲或沙律配一款湯。

依家涼涼哋就試咗日式芥末豆腐捲(單點HKD58)同粟米芋粒湯(單點HKD38),因為會先溫熱餅皮,包好餅捲後再熱一次,拎上手仲暖暖哋添。日式餅捲有大量枝豆、豆腐、沙律菜、蕃茄仔同牛油果,撈埋微辣嘅wasabi素醬汁又幾激活味蕾,完全冇食素嘅口淡淡感覺。而粟米芋粒湯都有好多粟米同芋頭粒,芋頭冇煮到腍晒,幾有咬口。

Combo Tea Set(HKD68)可以自選一樣咖啡或茶配一款小食。小編揀咗燕麥奶泡沫咖啡(單點HKD38/熱),因為可以自選Oalty燕麥奶、豆奶同杏仁奶,配合唔同人嘅口味。

地瓜薯條(單點HKD38)會灑上話梅粉,炸過後但入面口感仲係好「蓉」,有驚喜喎!

如果食甜品,絕對要試大熱嘅純素鮮果軟雪糕筒(HKD42)!小編揀咗成日售罄嘅紅火龍果加燕麥奶味(加HKD10),質感喺雪糕同雪葩之間,味道濃郁清甜,而且分量好足!

當然不得不提嘅仲有招牌Cold Pressed Juice(HKD62),呢杯冷榨純果汁有紅菜頭、雪梨同檸檬,小編見淨係雪梨都起碼落咗兩個咁多!入口檸檬香氣突出,仲令杯果汁唔會太甜添。士多啤梨希臘乳酪杯(HKD38)就好貼心咁分隔開果仁,食嘅時候先落就一定脆口喇。

想試勻蛋糕款式就要睇彩數喇,因為蛋糕唔係店內即製,賣晒就冇;不過提提大家,蛋糕唔係素食款式嚟嘅。柚子戚風蛋糕(HKD72)係比較暢銷嘅口味,面頭灑咗啲抹茶粉,咬到有柚子皮軟粒都幾清香㗎。飲品想濃少少就可以配杯士多啤梨洛神花茶(HKD38),茶底加埋水果一齊煲,比一般飲到嘅濃味好多,酸酸哋幾醒胃添。

想細件啲又有DAMA烈豔紅唇蛋糕(HKD42)藍莓啤梨熱情果蛋糕(HKD42)呢啲精緻嘅餅款,入面一樣層次豐富,香甜唔膩。搭杯清香嘅美顏玫瑰薄荷綠茶(HKD38/熱)會平衡甜度。想食得抵啲就亦可以點Combo Tea Set(HKD72或HKD98),任何一款蛋糕配咖啡或茶都得,蛋糕款式就可以揀選原價HKD42或HKD72嘅類別。

店內仲有伯爵茶、開心果等五款味嘅純素曲奇蝴蝶酥(各HKD10/件)俾大家揀。

熱愛純素咖啡的話,你可以買隻DAMA環保杯(HKD238),因為除咗送一杯果茶,以後用呢隻杯嚟買咖啡都會免費升級裝到滿杯呀!

 

DAMA
地址:尖沙咀梳士巴利道18號Victoria Dockside K11 Musea 4樓411號舖
電話:9527 2033
營業時間:星期日至四:11:30-22:00,星期五、六:11:30-22:30

You may also like...

Leave a Reply

Your email address will not be published. Required fields are marked *