【西環café推生酮×創意素食 招牌無麩質蛋糕鬆軟吸睛】Infiniti C By October

想有健康又好味嘅另類飲食體驗可以嚟呢度!Infiniti C By October係Infiniti C嘅分店,主打新式素食同生酮料理,亦有好多款吸睛嘅無麩質蛋糕,仲有啲啱素食者食嘅純素蛋糕添。快啲去片睇吓有咩食啦!

餐廳負責人October自己都一直進行緊生酮飲食法,設計菜單時就好希望將自己所認同嘅健康理念,例如無麩質、生酮飲食、素食呢啲飲食方式推廣出去,等更多人可以親身感受同比較各種飲食。

呢個Broccoli Crust Pizza(HKD102)以西蘭花做批底,大啡菇切片鋪上面,不含澱粉質,啱晒生酮飲食者。而呢個素食版pizza更用咗不含蛋奶嘅素食芝士,素食者同對蛋奶敏感嘅人都食得。當然素食芝士味道就相對上冇咁濃,但同個成個批都幾match;而西蘭花所做嘅批底口感幾腍身,西蘭花嘅味道唔太重,坊間好少食到,又幾特別喎。

另一樣生酮飲食推介就係Chicken Mole Poblano with Cauliflower Rice(HKD118)喇。醬汁食落有啲似咖喱,雞肉煮得夠腍又入味,仲有啲紅石榴粒做點綴,蘸埋旁邊啲乳酪嚟食,真係有啲食緊椰汁咖喱嘅錯覺。但旁邊竟然係配「飯」?睇真啲,「飯」底原來係用椰菜花整成嘅,驟眼睇真係好似平時食開嘅白飯咁,但就有更高嘅營養價值。

呢度有三款Beauty Smoothies(HKD82)俾你揀,都係以希臘乳酪同奇亞籽做果昔嘅底部,而上面嘅部分就以唔同蔬果加入燕麥奶或豆奶打成。粉紅色呢款就主要以紅莓、香蕉等鮮果打成,面頭就用乳酪、藍藻醬、火龍果醬畫花,賣相夠晒夢幻,大人細路見到都愛不釋手啦。味道酸酸甜甜咁好fresh,質地比較稠身,飲完都幾有飽肚感。

嚟到呢度又點可以錯過佢哋招牌嘅無麩質蛋糕呢?每次大約推出十款蛋糕,全部都主打無麩質同低糖,個別仲係生酮、純素款式。唔好以為無麩質蛋糕就會冇咁好食,佢哋嘅口感同樣咁鬆軟,味道比起坊間啲蛋糕絕對係有過之而無不及㗎。前面呢款純素嘅Vegan Sesame(HKD62)以糙米粉整成蛋糕質地,上面啲忌廉係以椰漿加入日本黑芝麻打成,味道竟然同平時啲忌廉冇乜分別喎,而且黑芝麻味好濃郁。

Lavender Earl Grey(HKD78)以淺紫色忌廉鋪面再加上薰衣草花瓣,真係靚到嘩一聲。下面就係伯爵茶蛋糕夾住伯爵茶忌廉,茶香十足㗎。

以紅莓醬同食用花點綴嘅Keto Raspberry Chocolate(HKD78),選用新鮮紅莓同生朱古力,一切就見到三層朱古力蛋糕同忌廉相間,朱古力味濃郁但唔太甜,啱晒啲唔鍾意食咁甜嘅朋友。

鍾意抹茶就絕對唔可以錯過呢款Matcha Tiramisu(HKD78),選用日本高級抹茶粉,加入嘅抹茶分量幾多,入口係濃郁甘香嘅抹茶味呀!

 

Infiniti C By October
地址:西環西邊街38號明德山地下A店
電話:2468 2848
營業時間:星期一至日:08:00-21:00

You may also like...

Leave a Reply

Your email address will not be published. Required fields are marked *