【深水埗平價糕品撼贏米芝蓮老字號 $7大件紅豆糕軟腍足料】平霸

坤記糕品係深水埗糕點界老字號,仲攞埋米芝蓮咁巴閉梗係多人識啦,但原來街尾仲有另一間同樣賣糕點嘅小店都好評如潮㗎。聽講呢間鴻發涼茶嘅傳統糕點足料又抵食,唔少客人仲話佢撼得贏米芝蓮老字號添。平霸今次就試晒兩間嘅出品,睇吓誰勝誰負!

先去米芝蓮老字號坤記糕品專家,一去到就已經見到好多客人幫襯,人氣真係有返咁上下喎。呢度糕點款式選擇都算多,大約有十種。而全部糕點都一個個入晒袋,獨立包裝夠衛生。揀咗紅豆糕、芝麻糕同茶果三件糕點,盛惠HKD31.5。

之後嚟到鴻發涼茶喇,舖頭係由一間地舖分拆出嚟,細細間唔多起眼。以為涼茶舖賣嘅糕點質素一定麻麻哋?錯喇!食過嘅客人都大讚佢哋嘅出品高質,食過返尋味㗎。不過呢間小店嘅糕點量冇坤記咁多,全部都係賣晒就冇。平霸去到已經冇晒芝麻糕、芋頭糕,就買咗紅豆糕、綠豆糕、雞屎藤同蕃薯餅嚟試。

左邊係鴻發出品嘅紅豆糕(HKD7),半圓形嘅紅豆糕大大件,大約係湯碗嘅一半;而右邊坤記嘅紅豆糕(HKD11)就長方形一嚿,size就細三分一。望落似乎鴻發嘅抵食啲,不過試埋味道再定斷!

左邊嘅紅豆糕入面有超多紅豆粒,夠晒足料,而且入口軟腍,啖啖紅豆蓉,食落仲有陳皮香,好似飲緊煲到起晒沙嘅紅豆沙咁;相反,右邊紅豆糕嘅紅豆量睇落就冇咁多,糕點質地再腍身啲,但紅豆就硬咗少少,冇陳皮味。

而鴻發除咗紅豆糕之外,仲有綠豆糕(HKD8)賣添。成塊有手掌咁大,綠豆煮得夠腍,綠豆味好濃,食落唔太甜,係低糖健康之選。

而坤記就有招牌嘅九層芝麻糕(HKD11),層層分明咁係睇得見嘅層次呀,質地就好似平時食開嘅千層糕咁黏糯、軟綿綿。本來想比較吓兩間嘅芝麻糕,點知鴻發竟然賣晒,唯有下次再試。

雖然芝麻糕賣晒,但鴻發店主就推介咗呢款有芝麻餡嘅蕃薯餅(HKD6),甜食嘅蕃薯餅煙煙韌韌咁,外表微微煎香,芝麻餡都算多,似係濃縮版嘅芝麻糊。而另一塊冇餡嘅蕃薯餅都係同價。

最後就試埋同樣都係花生餡嘅茶果。鴻發嘅雞屎藤茶果(HKD8)個皮比較硬,入面啲花生餡就乾身啲,質感同味道都同糖不甩啲糖花生差唔多,呢款茶果另有甜嘅芝麻同鹹嘅眉豆口味。而坤記嘅中山茶果(HKD9.5)就比較軟身,入面啲花生餡濕到黏埋咗一嚿,仲有種好似澀澀哋嘅橙皮味,都幾特別。呢款就另有紅豆沙、椰蓉同沙葛蝦米餡,口味都幾多元化。

平霸小評:試晒咁多款糕點之後,平霸就覺得鴻發涼茶嘅糕點全部都好足料、低糖,食落唔會太甜膩,其中有陳皮香嘅紅豆糕就最有驚喜。而且糕點定價唔高,比坤記賣得平但更大件。而坤記糕品嘅糕點品質其實都唔差,不過加咗價之後價錢就偏貴,唔多抵食喇。所以不論喺價錢、分量同質素方面,都係鴻發涼茶嘅出品佔優,可以話係撼贏坤記呀。

 

鴻發涼茶
地址:深水埗北河街128號地下
電話:2985 1846
營業時間:星期一至日:10:00-20:30

坤記糕品專家
地址:深水埗福華街115-117號北河商場地下10號舖
電話:2360 0328
營業時間:星期一至日:08:00-23:00

You may also like...

Leave a Reply

Your email address will not be published. Required fields are marked *