【HABITŪ table新推素食菜式 青大樹菠蘿薄餅香辣醒胃】HABITŪ table

最近HABITŪ table全線推出新菜式,當日有唔少係素菜同純素款式添;其中青大樹菠蘿薄餅、紅菜頭威靈頓、芒果牛油果醬墨西哥脆片不論味道同口感都幾特別,即刻帶你睇真啲啦!

店內環境走北歐感覺,令大家喺度食嘢可以暫時遠離煩囂。

先介紹呢款生酮沙律(HKD98),雖然唔係素菜,但以略帶鹹味嘅低脂日式海藻沙律汁撈勻羽衣甘藍、菠菜、奇亞籽、合桃、牛油果等營養食材;另外仲配有烤雞片、意大利火腿、瑞士芝士同雞蛋,食晒都唔覺得滯,味道層次仲好豐富添。

芒果牛油果醬墨西哥脆片(HKD88)大大份,當中嘅墨西哥脆片喺純素㗎,如果落單時講明走芝士同酸忌廉,咁就完完全全係純素菜式喇。面頭鋪滿自家新鮮製作嘅芒果牛油果醬伴酸忌廉、莎莎醬同墨西哥辣椒,惹味但唔會好濃烈,反而因為有芒果肉粒而更香甜juicy,完全唔會漿口。

純素菜式之一嘅紅菜頭威靈頓(HKD158)靈感明顯來自威靈頓牛扒,不過依家酥皮包住煮好嘅菠菜、甘荀、蕃薯蓉、有機藜麥、慢烤紅菜頭、松露蘑菇醬再焗,入口感覺清新好多。蘸埋以腰果蓉代替cream整成嘅甘荀醬,味道更加清甜。

青大樹菠蘿薄餅(HKD148/9寸)喺薄餅底搽上用BBQ醬煮過嘅青大樹菠蘿,惹味得嚟口感仲有啲似手撕豬肉喎;再鋪上自製嘅芒果牛油果醬、新鮮羽衣甘藍、紫椰菜,味道酸甜開胃,仲有少量生洋蔥帶嚟刺激嘅辛辣味道。如果想味道fresh啲,唧少少青檸汁可以中和濃郁嘅BBQ醬味道㗎。

初時見到呢杯巴西莓果杯(HKD68)以為係飲品,但其實係甜品嚟㗎!將香蕉、士多啤梨、藍莓、巴西莓等生果連同豆奶一齊打爛做底,果味清新又香滑。面頭再放上大量麥片、有機奇亞籽、杞子、椰絲同香蕉片增加口感,係一個富營養又唔肥嘅甜品呀!

新推出嘅冷萃咖啡系列以自家烘焙嘅Classico No.3咖啡豆沖泡,再配伯爵茶、椰子水或青瓜三款口味。小編就試咗配有原片青瓜嘅冷萃青瓜咖啡(HKD52/左),入口有淡淡青瓜味,同酸甜度適中嘅冷萃咖啡好夾仲好清新添;加上同樣以Classico No.3咖啡豆沖泡製成嘅咖啡冰,咁就唔怕冰塊融化會溝淡咖啡嘅味道啦。如果想歎杯熱飲,不妨試吓幾受女士歡迎嘅熱薑黃泡沫豆奶(HKD52),主要以豆奶同薑黃沖泡,暖胃驅寒,面頭仲灑咗少少黑椒提起香氣,都幾特別㗎。

 

HABITŪ table
地址:尖沙咀彌敦道132號美麗華廣場一期低層地下B142號舖
電話:3572 0846
營業時間:星期一至四:11:30-22:00,星期五:11:30-23:00,星期六:11:00-23:00,星期日及公眾假期:11:00-22:00

You may also like...

Leave a Reply

Your email address will not be published. Required fields are marked *