【i CREMERiA推聖誕法式Crepe 草莓聖誕甜品旺角店限定】i CREMERiA

開心要食甜品,唔開心又要食甜品,臨近聖誕節,更加係食甜品嘅節日啦。i CREMERiA就推出一系列冬日限定新品,有全新嘅法式Crepe、士多啤梨主題聖誕蛋糕同埋精緻嘅聖誕Tea Set,俾你甜住過聖誕!唔少新品都係喺旺角朗豪坊店獨家發售,依家率先睇吓有咩正嘢先。

喺朗豪坊中庭分店嘅甜品都開始換聖誕新裝,一系列十款嘅士多啤梨聖誕蛋糕已經喺度等緊大家喇,而法式Crepe系列就會喺12月13日推出,想食就要記住推出日期喇。

首先隆重介紹朗豪坊店獨家發售嘅聖誕雜莓軟芝士慕斯午後輕食(HKD148),成個Set有人氣嘅雜莓軟芝士慕斯蛋糕,以紅莓脆脆點綴嘅榛子雪糕配上新鮮雜莓粒;仲有一杯自選飲品俾你揀,其中新出嘅榛子雪糕味道濃郁,比較少食到呢個味道。呢個Tea Set係聖誕限定,想食就要快喇!

除咗Tea Set之外,今次仲一口氣推出十款以士多啤梨做主題嘅聖誕蛋糕,全部都有一人份,自己獨享或者買多幾款開心share都得呀!小編精選其中3款俾大家,左邊嘅士多啤梨曲奇脆脆杯(HKD78)將士多啤梨切面圍住成杯,仲有曲奇脆脆,食落超有口感;而中間呢款就係士多啤梨芝士梳乎厘(HKD78),質地軟滑,食落好似日式芝士蛋糕;右邊嘅士多啤梨吉士撻(HKD78)都唔輸蝕,以杏仁忌廉口味做撻皮,再鋪滿層層士多啤梨,睇見都流口水啦。

望見咁多配料,都估到係用嚟整佢哋全新嘅法式Crepe系列。提多一次,呢個系列將會喺12月13日推出,到時會有5款全新口味喺朗豪坊店發售,其中更有稍後推出嘅日本溫室蜜瓜口味,大家要期待吓喇。

面頭灑滿玫瑰花瓣嘅就係Rose Lychee Crepe(HKD78)喇,賣相係咪特別「少女」呢?微脆嘅餅皮入面唧滿忌廉、吉士,再包住荔枝、雜莓,加入特製嘅慢煮紅莓醬、玫瑰醬,食落充滿花香同果香;仲有白朱古力脆脆喺裡面增加口感添,睇得又食得。

Berry Chocolate Crepe(HKD78)就特別以朱古力餅皮包住士多啤梨、朱古力脆脆,入面用咗有機可可碎粒嚟提升朱古力味,面頭仲有粒火炙過嘅焦糖士多啤梨做點綴,將成個賣相升級呀。

另一款朱古力口味就係Bitter Chocolate Banana Crepe(HKD68),用咗特濃朱古力醬同鮮甜嘅香蕉做主角,朱古力味特別濃呀!

最後呢款Creme Cheese Brulee Crepe(HKD78)有奶油芝士喺裡面,再以吉士醬封頂,加埋砂糖後再火炙燒至金黃色,成個焦糖面脆卜卜,一咬即爆半融芝士,各位芝士迷唔好錯過喇!

 

i CREMERiA
地址:旺角亞皆老街8號朗豪坊4樓13號舖
電話:2897 3908
營業時間:星期一至日:10:00-23:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *