【中環新店熱賣巴西莓果碗 星空Acai Bowl健康吸晴】AcaiNow

同平時啲雪糕、沙冰唔同,以Super Food巴西莓整成嘅Acai Bowl可以話係健康飲食嘅潮流呀!中環最近新開咗一間香港少見嘅Acai Bowl專賣店,呢間AcaiNow以招牌巴西莓、亞馬遜熱帶水果瓜拿納、古樸阿蘇製作出一系列有益好味嘅Acai Bowl同巴西莓雪糕。舖頭更推出以星空做主題嘅新品,紫藍色嘅星空碗夠晒夢幻,打卡必點呀!

主要做外賣生意嘅Acai Bowl專賣店舖面細細,以三粒巴西莓做佢嘅招牌,非常簡潔。店內有道打卡牆,俾你同咁IG-able嘅果碗打吓卡先!

呢啲紫色嘅粉其實係巴西莓果粉,將巴西莓冷凍風乾再磨成粉,呢種Superfood有非常高嘅營養價值,可以抗氧化同預防心血管疾病,所以價錢都唔平㗎。舖頭引入呢款巴西莓粉嚟香港,製成店內Acai Bowl基底嘅主要用料,夠晒矜貴有益。

舖頭每日都先將巴西莓果粉混合水果、椰奶等打成漿,雪凍成冰塊備用。喺客人落order嘅時候,再將冰塊打成果泥,做Acai Bowl嘅基底。呢個做法冇加水,令打出嚟嘅果泥更加濃稠,入口軟滑又有濃郁嘅莓味。

新推出嘅Starry Fantasy星際奇緣(HKD68/Regular)簡直係打卡必點呀!同樣以巴西莓果泥做基底,面頭咁靚嘅星空就以椰漿、蝶豆花、巴西莓混色而成,再以黑莓、堅果等做點綴,簡直係食得嘅藝術品呀!

Jungle Power熱帶雨林碗(HKD75/Regular;HKD48/Baby)就係Acai Bowl嘅經典款式,全個果碗基底都係巴西莓果泥,面頭啲堅果仲係自家調味,健康又好味道!

熱賣之選有呢款Amazon Bowl亞馬遜能量碗(HKD95/Regular;HKD68/Baby),基底有一半係巴西莓果泥,另一半就係瓜拿納果泥,再以大量水果同堅果做topping。入面仲加入蛋白粉,食落更有飽肚感,拎佢嚟做代餐都得喎。

除咗Acai Bowl之外,舖頭仲有Acai Cone(HKD48/Jumbo[右])賣添!呢款巴西莓雪糕加入極多巴西莓粉整成,莓味十足,容易入口。質感同雪葩相似,而且呢款雪糕不含牛奶同忌廉,連不耐乳糖嘅人都啱食㗎。另外,仲有加入同樣來自亞馬遜嘅水果瓜拿納同古樸阿蘇,食落酸酸甜甜好開胃,夠晒fresh呀。唔好睇佢哋顏色咁似,味道都有出入㗎,揀唔到就可以嗌混合嘅Mixed Jumbo(HKD50[左])喇!

 

AcaiNow
地址:中環閣麟街45-47號祥暉大廈地下5A號舖
電話:9475 6241
營業時間:星期一至日:10:00-20:00

You may also like...

Leave a Reply

Your email address will not be published. Required fields are marked *