【Fortnum’s海景伴經典下午茶 精選全日菜+聖誕禮品】Fortnum & Mason

英國人氣品牌Fortnum & Mason,首間海外店喺尖沙咀K11 Musea終於全面正式開業喇!兩層高嘅專門店同餐廳貫徹品牌嘅高雅華麗風格,依家就同大家睇吓呢度一系列富英倫風味嘅全日菜;當然唔少得萬眾期待、好搶手嘅三層高經典下午茶啦,裡面嘅鹹甜點全部都可以無限refill,想食就要趁早訂座喇。

尖沙咀新店樓高兩層,地面就係做食品禮盒嘅零售專門店,上一層就係面向維港嘅海景餐廳。餐廳Fortnum’s 181就以Fortnum’s嘅倫敦總店地址「181」命名,延續英國店優雅、高貴嘅風格。店內以品牌獨特嘅「尼羅河之綠」做主題色,全店無論係裝潢、茶具定商品都用咗呢種顏色,好有代表性呀!

當店員扭動過百年歷史嘅巨型音樂盒,就象徵下午茶時間正式開始喇。呢度最hit嘅經典下午茶(HKD588/位)聽聞連英女皇都鍾意食㗎!三層高嘅下午茶有齊鹹甜點同鬆餅,另外配埋自家品牌士多啤梨醬、檸檬蛋黃醬同忌廉;其中酸酸甜甜嘅檸檬醬配鬆餅食就特別開胃清新。三層架上面嘅茶點全部都可以無限量refill,打破三層下午茶食唔飽嘅宿命。而下午茶仲會跟埋一壺Fortnum’s茶添,咁就食幾多都唔怕膩啦。

底層5種口味嘅手指三文治,由左至右分別係加冕雞、Fortnum’s自家品牌嘅煙燻三文魚配韃靼沙拉醬、青瓜配薄荷奶油芝士、珍稀雞蛋蛋黃醬配水芹同埋諾福克醃火腿配英國芥末。

除咗鹹點同鬆餅之外,甜品都係一個Tea Set入面嘅必要元素。呢個Tea Set嘅頂層就有5款精緻蛋糕俾你慢慢歎喇。

下午茶固然出名啦,但呢度仲有好多全日菜式都好出色㗎。頭盤就有蘇格蘭蛋配黑布丁及英式酸辣醬(HKD208),用咗英國傳統食物Black Pudding嚟做蘇格蘭蛋嘅外層,Black Pudding係以動物血、內臟同肉碎整成,有啲似台灣嘅米血,味道就再香濃啲。而入面個蛋黃就煮到啱啱好,仲係流心添。

另一款蟹肉配蛋白、香菜及蛋黃(HKD218)都係必食嘅頭盤推介,餐廳將蟹肉壓成餅狀。蟹肉餅分成上下兩層,下層就係蟹醬,用蟹肉、芥末、蕃茄醬等醬汁調製而成;上層係一絲絲蟹肉,面頭再鋪上香菜、蛋黃碎同蛋白碎,食落口感豐富又鮮味喎。

嚟到主菜喇!法式牛油香煎Brixham龍脷魚(HKD558)大大條,肉質幾鮮嫩。大廚並冇用複雜嘅烹調技巧,只係將新鮮嘅龍脷魚用牛油煎香就原條上枱,不過配有檸檬同特製醬汁俾你調味。

而呢道南瓜意大利雲吞配松子仁及鼠尾草(HKD248)除咗一望就見到嘅南瓜粒之外,一咬開粒意大利雲吞仲食到滿滿嘅南瓜蓉內餡,細滑香甜。

餐廳嘅甜品更加冇令大家失望,大大杯嘅英式傳統新地(HKD118)就夠晒滿足呀!呢杯新地以士多啤梨做主題,入面唔止有大量新鮮士多啤梨果肉、雪糕同埋自家品牌士多啤梨果醬,仲有菠蘿肉添,再將忌廉炙燒封頂,層次分明又有多重口感。

而呢款喬治國王布甸配白蘭地醬(價錢待定) 就係聖誕限定甜品,淋上白蘭地醬令布甸嘅酒香更加濃郁。

食飽飽就可以到下層專門店買佢哋自家品牌嘅食品禮盒喇!好多人都重點買Fortnum’s嘅茶葉同餅乾,但其實仲有酒類、咖啡、果醬等商品㗎。臨近聖誕,一於等小編精選啲聖誕限定商品俾大家啦!

Christmas Spiced Black Tea (HKD248/200g)

聖誕迷你餅乾音樂罐(HKD198)

兒童巧克力聖誕倒數月曆(HKD298)

【Fortnum & Mason開業 率先試香港限定茶葉】Fortnum & Mason

尖沙咀 ∣ 小編經過K11 MUSEA見到181 at Fortnum & Mason尋日開業,即刻衝入去睇吓有咩特別產品,原來出咗香港限定嘅茶葉款式同Hamper,即刻睇片啦!#FortnumandMason #茶葉 #率先試 #香港限定 #RoyalBlend #Hamper Fortnum & Mason地址:尖沙咀梳士巴利道18號 K11 Atelier 022號舖電話:從缺營業時間(暫定):星期一至日:10:00-19:00Too Full For Food,超過96% 真.香港讀者一直收睇!——————————追蹤Instagram:https://goo.gl/vHDmwY——————————

Posted by Too Full For Food 太飽喇 on Wednesday, 20 November 2019

想詳細啲了解下層嘅專門店有咩商品?即刻睇埋呢條片嘅介紹啦!

 

Fortnum & Mason
地址:尖沙咀梳士巴利道18號 K11 Atelier 022&122號舖
電話:3916 8181
營業時間(專門店):星期一至日:10:00-19:00
營業時間(餐廳):星期一至六:11:30-Midnight,星期日:11:30-23:30

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *