【灣仔新開日式燒肉小店 廚師發辦食盡各式牛肉】初心日式燒肉店

食燒肉想食得精緻啲,可以試吓灣仔新開嘅初心日式燒肉店,呢度主打Omakase燒牛肉,會不時轉換牛肉產地同部位,令你品嚐到各種肉香。成個餐約有十道菜,大廚會按時節調配新菜式,依家就睇吓小編試到咩款式啦!

燒爐以備長炭炭燒,仲用上岩鹽為菜式調味添。

二人份Omakase

Hatsukoko Omakase(HKD688/位)主要以牛肉為主,亦配有醋鯖魚同日本薩摩雞隔開純牛肉嘅濃烈肉味。先食有蘿蔔、青瓜、牛蒡同蒜頭4款清爽醃菜開開胃,然後就品嚐第一道菜喇!

先嚟選用日本A3和牛製作嘅牛肉他他,撈咗用牛脂整成嘅秘製蒜牛油、岩鹽同柚子皮等調味,入口清香滑溜,完全唔似食緊生牛肉喎。

然後到澳洲牛舌薄燒,一次可以試到爽口嘅牛脷尖同有咬口嘅牛脷芯。

為咗令大家唔會連續食太多燒肉而覺得油膩,跟住就食醋鯖魚解油。加咗秘製芥末柚子醋汁味道酸辣,配埋清香嘅芽蔥同海帶一齊食就更加有口感喇。

醬燒M5和牛下牛肩肉味道唔會太重,自家調配嘅醬汁鹹中帶甜,肉邊燒到微微焦香仲更加惹味添。

跟住到壽喜燒濕濕口,蔬菜以牛油炒香,比平時食到嘅壽喜燒多咗層鑊氣嘅感覺。而且呢鍋仔有3大塊肉咁多,食到呢度都有啲飽添。

然後係鹽燒M5和牛上牛肩肉,別配上微辣嘅山葵漬(左)同香口嘅柚子胡椒醬(右),一味兩食試到唔同感覺幾滋味喎。

然後仲有燒薩摩雞髀肉、加入牛肉嘅燒飯糰牛肉味噌湯真係大滿足呀!

不過點飽都好,最後一定要食埋以岩鹽、蜂蜜同話梅粉提味嘅燒菠蘿收尾先夠圓滿嘅。

餐廳嚟緊就會考試推出本地鮮牛肉為題嘅Omakase,肉迷要留意喇!

 

初心日式燒肉店
地址:灣仔麥加力歌街13號地下
電話:5905 7753
營業時間:星期一至五:11:30-15:00,18:00-22:30,星期六:18:00-22:30 (星期日休息)

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *