【最快摘星餐廳TIRPSE登港 7道菜法式晚餐用料精緻】TIRPSE

被Diners Club International選為世界50佳餐廳、亞洲僅有6家獲此殊榮、創造開業兩個月就獲得米芝蓮一星最快摘星紀錄、連喺日本美食網站Tabelog都獲得4.11分高評嘅法餐廳TIRPSE係咪食味道咁簡單?當然唔會啦!依家嚟到香港K11 MUSEA開業,亦將法國嘅用餐文化帶俾大家。店名係將法文ESPRIT反轉嚟寫,有「隱藏嘅法國精神」意思,亦希望餐廳呈現日本文化。店內設計以「叢林中的寶箱」為題,店內有唔少綠色元素之餘,仲有個大鐘提醒大家用餐時要用心同朋友交流,亦用心品嚐食物,因為每一餐飯嘅時間都好寶貴,依家就睇吓有幾正啦!

由門外悠閒嘅等候區,到店內滲入唔同概念嘅精心設計,都係想帶俾大家不一樣嘅法國菜體驗。餐廳依家有午餐、下午茶同晚市套餐,以法國菜嚟計,呢度嘅7道菜晚市套餐(HKD1,188/位)價錢都算合理喎。

喺前菜之先仲有兩道AMUSE BOUCHE配香檳,首先係以蘋果批為概念轉化而成嘅蟹肉批,外皮酥軟配上絲絲蟹肉幾鮮味喎。

然後就係海膽撻,平時總覺得要有大量海膽先食到佢嘅味道,但呢份精緻嘅size都充滿海膽嘅鹹鮮味。

到真正嘅Starter可以二揀一,呢份Oyster Spinach Hazelnut Oil(牡蠣菠菜榛子油)以60°C慢煮嘅方法將肥大嘅生蠔煮至半熟,令口感保持爽滑。食嘅時候揭開面頭風乾嘅菠菜,先切一半蠔肉品嚐原味;另一半就連埋風乾菠菜、底下嘅鮮煮菠菜同醬汁一齊食,會有微微鹹甜交融嘅味道,口感層次仲好豐富添。

另一道前菜Shirako Potato Truffle(白子松露)喺惹味中帶點清香。白子略煎過令表面輕微焦脆,配埋底層嘅薯仔蓉同面頭嘅松露,又會滲返植物嘅香氣出嚟,唔會覺得油膩,之後飲埋湯就到Third Course喇。

Third Coures有兩款魚可以揀,小編就試咗Branchiostegus Clam Yuzu(蜆肉柚子汁煮金鯛)。將金鯛連鱗半煎炸煮起再焗一陣,帶有皮脆肉嫩兩種口感。湯汁就以金鯛魚骨、蜆肉同柚子煮成,入口柚子香味濃郁又鮮甜,加上時令蔬菜,食晒都唔會滯,反而開始有啲飽。

Main Course都有兩款可以揀,除咗牛扒就係呢款Guinea Fowl Carrot Girolle(香煎法國珍珠雞),煎封外皮再慢煮嘅雞肉嫩滑有彈性。

Mini Dessert嘅Guinness Ice Cream (健力士啤酒雪糕)酒味幾香,配埋白朱古力片同脆脆又令甜味走返出嚟。

Dessert同樣兩款俾你揀,Kalamansi Mousse(草莓石榴醬慕斯配薑味雪糕)就一份試到兩款甜品。先食甜甜酸酸、內藏白朱古力包住果醬嘅慕斯,再食薑味雪糕就可以解甜喇。

另一款甜品係Mascarpone Cream (糖漬金枯配Palo Santo雪糕),以麵粉、黃糖同可可焗製嘅脆皮,配上自家製、美國南部特色嘅Palo Santo雪糕同糖漬金桔,無論味道同口感都好豐富。

 

TIRPSE
地址:尖沙咀K11 MUSEA 219號舖
電話:2333 0031
營業時間:星期一至日:11:30-22:30

You may also like...

Leave a Reply

Your email address will not be published. Required fields are marked *