【營養師拆解「辨色減肥法」 新年大餐識食識選擇】懶健康貼士

相比其他坊間嘅減肥方法,「辨色減肥法」可能比較少聽到,但亦有唔少人用呢個方法減到數十磅。新年就到喇,就算勁刷一餐都想食得健康啲,依家就等營養師Moses拆解呢個辨色減肥法,點樣根據食物嘅顏色而決定佢係咪健康食得過啦!

3大核心原理

辨色減肥法容易成功嘅原因,係因為容易令人記得,只需要記住顏色所代表嘅意義,然後避開相關食物就得,唔使計熱量同脂肪含量等數字。但缺點係有可能以偏概全,連健康嘅食物都踢走,導致營養不均。不過令每個人致肥嘅食物顏色同原因都唔一樣,所以實行之前都要咨詢營養師或醫生,了解自己嘅飲食問題。依家即刻了解辨色減肥法3大核心原理,同點樣喺新年時間應用啦:

 

1. 走黃色!

呢個方法要求少食加工過嘅黃色食物,因為脂肪同油都係黃色,而加工過嘅食品都係偏黃色,仲大部分都係高熱量添。所以酌量食油角、煎堆、笑口紅棗、蛋卷等油器應吓節好喇。

 

2. 愈透明透好

媽媽們平時已經鍾意煲啖湯水俾屋企人潤吓,新年就更加不在話下。透明一般代表較少添加物同脂肪。例如湯水經過長時間烹調,肉嘅脂肪就更易釋出,湯色亦會較混濁,所以記得提媽咪今年煲蠔豉湯要揀瘦啲嘅肉喇。呢個概念延伸到經常食嘅賀年糕點的話,盡量少食較深顏色嘅年糕、蘿蔔糕同芋頭糕。可以選擇較透明同低熱量嘅馬蹄糕,但要留意當中有白砂糖陷阱,因溶喺水都係透明,所以最好都係睇埋營養標籤。

 

3. 每餐要多色彩

辨色減肥法嘅優點係每餐最好包括唔同顏色嘅食物,蔬菜、紅白肉、五穀米等都盡可能配搭出綠、紅、黃、咖啡、深褐等顏色,令飲食變得更均衡,因為每一種顏色都代表食物含有唔同嘅營養素。新年大餐可以食較低脂嘅大蝦、鮑魚、低鹽烤焗開心果等,但唔好忘記同時食七彩顏色嘅蔬菜同水果呀。

 

Moses Lee

現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。依家為有需要控制體重嘅人士同運動員提供營養治療,制定飲食方案。

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *