【OL恩物鬧市速食燉湯 炒滑蛋醬油飯+惹味小食】嘗粵

行街除咗shopping,梗係要掃街啦。喺銅鑼灣SOGO最近開嘅嘗粵唔止有小食,仲有燉湯同炒滑蛋醬油飯,可以單點或配成套餐,真係要飽又得,要過口癮亦得。

難得喺SOGO搵到間偏中式嘅料理店,睇嚟SOGO都想帶啲新感覺俾大家。

呢度有4款燉湯,其中一款係期間限定,依家就有當造嘅西洋菜陳腎湯(HKD62),清甜潤喉又足精。而OL必似嘅一定係杏汁白肺燉湯(HKD62),奶白湯色飲落夠晒潤。如果平時lunch亦可以喺度買套餐(HKD88),跟1 款燉湯同1款醬油飯㗎。

炒滑蛋醬油飯(HKD38-42/單點)有火炙叉燒、火炙美國肥牛同雞柳三款俾你揀。小編就試咗火炙叉燒,入口幾似配拉麵嗰種叉燒,而且火炙後迫咗啲油香出嚟,都唔錯喎。加上日本米醬油飯撈咗日式醬油同麻油,味道更加鹹香有咬口。

金沙脆魚皮(HKD38)係即叫即撈,有大量鹹蛋黃醬但唔會過鹹,而且擺得耐都依然脆口!

日式炸魚豆腐(HKD38/6件)有明顯嘅魚肉嘅鮮同豆腐嘅甜,炸完入面都幾juicy。

櫻花蝦咖喱魚蛋(HKD28/3粒)就用咗大粒又彈牙嘅長洲大魚蛋;咖喱汁唔算太辣,但落咗櫻花蝦就多份微脆同鹹香嘅層次。

 

嘗粵
地址:銅鑼灣崇光百貨地庫B2層35號店
電話:2831 8850
營業時間:星期日至四:10:00-22:00,星期五、六及公眾假期前夕:10:00-22:30

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *