【「福岡漢堡扒」親民價登港 石燒套餐香濃惹味】福岡漢堡扒

以後要食石燒牛又多一個選擇喇!今次係由韓國過江嚟嘅福岡漢堡扒,以親民價見稱,嚟到香港都一樣抵食喎。而且招牌球形嘅漢堡扒係由韓國運嚟香港,保證食得返當地以和牛同韓牛混合而成嘅味道!負責人之一嘅Kelson就話:「我哋鍾意佢平得嚟肉味好香,用咗兩年時間先同韓國傾到代理返嚟,想俾多啲人食到呢種味道。」。講到咁好,即刻睇吓出品係點先。

香港店跟韓國其中一間店嘅設計,令你入到嚟更加感受到「韓味」。

香港店大約帶咗10款韓國餐牌過嚟,單點、午餐同二人餐都有。

單點款式有大、中、細size可以揀。食辣嘅朋友就必點墨西哥辣椒和牛漢堡扒[S](HKD96),如果其他口味都可以另外要求加墨西哥辣椒(加HKD10)。提提大家切細份啲就煎得更嫩滑,因為石燒板大約有380度,煎3至5秒就好反一次喇。

部分午餐會跟前菜、湯同飯,好似用上安格斯牛肉嘅石燒牛扒午市套餐(HKD100)都幾大份,重肉味又少油脂;最好煎嘅時候撥開啲芥末醬就冇咁易燒焦。

兩人套餐(HKD288[Ver.4])有4款配搭,全部都會配前菜、沙律、湯、飯同汽水;亦可以揀升級特飲(加HKD18),有西柚、青蘋果同巨峰提子三款口味。而呢款Ver.4組合就可以一次過試晒球形漢堡扒、石燒牛扒同東武里牛丼。

跟餐配嘅芝士蛋蒜和牛漢堡扒[S]入口肉味幾濃,唔係得煎嗰吓香㗎。而且調味啱啱好,惹味又唔過鹹。

石燒牛扒配上蔬菜同菇解油。

東武里牛丼嘅牛肉本身已經爽口,蘸埋蛋汁食就更香滑。

 

Fukuoka Hambageu 福岡漢堡扒 香港旗艦店
地址尖沙咀厚福街11號A地下
電話:5929 9167
營業時間:星期一至日:11:30-23:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *