【新開共享空間設魚素餐飲 植物肉入饌推低碳料理】The Green Room

餐餐大魚大肉好重負擔?依家就介紹呢間最近喺銅鑼灣新開嘅The Green Room俾大家啦!由發展共享空間嘅WeWork同餐飲品牌Leading Nation合作,打造以健康素食同可持續發展餐飲做主題嘅多用途活動空間。等你享用舒適嘅共享空間,同時可以食到輕盈、冇負擔嘅魚素餐飲。

The Green Room Salad

Quinoa Salad

想食頭盤沙律,就有The Green Room Salad(HKD75)Quinoa Salad(HKD75)兩款健康之選。前者主要用時令蔬菜入饌,再配合有迷迭香、百里香同意大利橄欖油等香料混合而成嘅油醋汁,夠晒清新!而後者呢款藜麥沙律就用咗秘魯100%有機白藜麥加埋芒果、車厘茄同紅洋蔥,面頭仲有嫩滑彈牙嘅本地虎蝦做點綴添。

呢味並唔係普通嘅肉醬意粉咁簡單,而係以「未來肉」整成嘅Impossible Bolognese(HKD115)。所謂「未來肉」即係主要以大豆製成嘅植物肉,代替傳統整肉醬嘅牛肉,但原來賣相同味道都同真肉好似,絕對呃得到人!但食落就比真肉無咁膩,亦冇咁大負擔。

Butter Lobster(HKD350)用咗原隻龍蝦燒烤而成,再以特製嘅沙沙醬汁淋喺面頭。醬汁混合咗鮮蕃茄粒、橄欖油同菠菜碎,突出返龍蝦嘅鮮味添。

嚟到呢度必食Spinach Ricotta Ravioli(HKD120),即叫即做嘅意大利雲吞以菠菜、乳清芝士、日本流心蛋做內餡,配埋檸檬牛油忌廉汁,一切開就有蛋黃流出,夠晒香滑兼IGable呀!

Margherita

Norway

手製薄餅都係呢度嘅特色菜之一,呢兩款薄餅嘅餅皮都係用意大利麵糰經8個鐘發酵而成,口感煙韌有咬口。經典嘅Margherita(HKD95)面頭落咗意大利新鮮水牛芝士同自家種植嘅羅勒葉;而Norway(HKD120)就放咗挪威煙燻三文魚同半熟蛋做配料。

飯後甜品有Caramelized Apple Flambe(HKD55),喺忌廉下面嘅焦糖蘋果有濃郁香料味;做法類似蘋果金寶,但加咗冧酒再用火微微炙燒,將淡淡酒香滲入蘋果當中。

Pancake Stack(HKD75)就加咗野莓同有機蜜糖,班戟蛋味濃郁,簡簡單單嘅甜品都夠晒滿足。

除咗嘢食,呢杯由著名調酒師John Nugent親自調製嘅Berries & Spice(HKD65)有紅黃漸層效果,仲加入五香粉、小豆蔻等唔同香料,喺蔓越莓梳打主調下略帶薑味,飲落幾醒胃。

 

The Green Room
地址:銅鑼灣謝斐道535號Tower 535 26樓
電話:3689 2569
營業時間:(一月)星期一至日:08:00-18:00,(二月)星期一至日:08:00-22:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *