【尖沙咀新店雲集多國麵食 必食牛腱麵+開胃茄牛米】YUMMEE

你想食拉麵,朋友想食船麵?媽咪要食台式牛肉麵,老豆想食越南牛肉河?想一次過滿足大家嘅願望,依家去尖沙咀嘅YUMMEE就得喇,呢度有13款東南亞人氣麵食,實滿足到成班人嘅口味。

店內設計行簡約文青風,有啲去咗大型cafe嘅感覺。

呢度每款麵都以地名做開頭,本地代表就有九龍蕃茄濃湯和牛湯粉(HKD98)就以茄牛麵為藍本,以牛骨同牛胸肉做湯底主料,加入洋蔥、芹菜、冰糖等慢煮;再放入自家製牛肉蕃茄醬增加湯底濃度同酸甜度,入口幾開胃,而且濃味嘅和牛肉配幼滑米粉又唔覺滯。

台北紅燒牛腱麵(HKD98)以豆板醬同柱侯醬慢熬8個鐘,湯底濃郁微辣。配上三至四塊軟腍嘅厚切牛腱,都幾有台灣風味。

鍾意食脆口嘢嘅朋友就要試上海麻辣黑毛豬扒擔擔麵(HKD98),雖然味道唔係好麻辣,但充滿花生香嘅湯汁同鬆脆大塊嘅炸豬扒都好惹味。

而港人大愛嘅曼谷牛腩船麵((HKD98)就以牛血同多種泰國草藥熬煮,鹹香易入口。配上牛丸、牛腩、羅勒、蕹菜同脆豬肉,食晒都幾飽㗎。

如果要震撼啲就有吉隆坡龍蝦海鮮蝦麵(HKD188),係一款當地漁民二戰後發展出嘅一款麵。以蝦頭、蝦殻熬湯配福建蝦麵,再加入半邊龍蝦、豬腩肉、青口等材料提升鮮味,仲有溏心蛋同另外配嘅微辣參巴醬,加埋一齊特別香濃惹味。想飲杯特別啲嘅飲品,不妨試吓白熊牛油果(HKD46),清甜又椰香味十足,加上整成熊仔樣嘅椰子冰,唔怕愈飲愈淡口。

呢度都有小食俾大家揀,其中有啖啖肉嘅粵式籠仔金蝦餃(HKD26)、香辣惹味嘅慢煮豬腩肉配泰式酸辣醬(HKD48)同鹹香薄脆嘅炸蝦薄餅(HKD42)都值得一試。

近門口嘅雪櫃有多款啤酒同少量甜品,喺度輕鬆食啲嘢唞吓。

 

YUMMEE
地址:尖沙咀梳士巴利道18號K11 MUSEA1 樓136號舖
電話:2344 2366
營業時間:星期一至日:11:00-22:00

You may also like...

Leave a Reply

Your email address will not be published. Required fields are marked *