【Duck & Waffle情人節限定餐單 三款主菜首選鴨肉窩夫】Duck & Waffle

Duck & Waffle自從進駐ifc就一直都多人訂位,而且必點招牌嘅鴨肉窩夫。今個情人節限定餐單(HKD1,588/2位),佢哋都將呢道招牌菜加入主菜俾大家揀!成個餐有小食、前菜、主菜、甜品四部分,依家就睇吓有咩食啦!

小食有兩款,其中OX Cheek Croquette幾脆口,配上辣辣哋嘅蛋黃醬就更加惹味喇。

前菜有兩款俾你揀,不過USDA Prime Beef Carpaccio就比較濃味。而且加咗新鮮松露、龍蒿蛋黃醬、巴馬臣芝士同香蔥,令入口味道更香同多層次。

主菜雖然有三款可以揀,但有招牌菜式Duck & Waffle真係好難抗拒。用唔同香料醃咗48個鐘、慢煮10個鐘再炸嘅油封鴨髀放喺用白脫牛奶整成嘅窩夫上面,再鋪上煎至半熟嘅鴨蛋,旁邊伴以秘製嘅芥末楓糖漿。肉質外脆內嫩蘸埋半熟嘅鴨蛋黃同芥末楓糖漿,鹹甜交融,層次夠晒豐富!

不過另外嘅Grilled Seabass都一樣好香口㗎,嫩滑嘅魚配上鱘魚魚子醬,令味道更加鮮甜;仲有Loin of New Zealand Lamb配香脆千層炸薯塊,無論揀邊款都令你有肉食呀!

作為收尾嘅甜品,Dark Chocolate Mousse配上餅乾雪糕、白芝麻Ganache同黑朱古力碎,甜蜜又脆口。

如果另加HKD220升級為雞尾酒配酒餐單,就可以飲到分別代表一男一女嘅特調雞尾酒喇。For Her(左)喺氈酒加入Malbec紅酒同藍莓忌廉,面頭鋪一層白朱古力調製而成嘅泡沫。For Him(右)就以波本威士忌混合楓糖漿、咖啡苦精,味道深沉濃郁。睇埋詳細menu,想訂枱就要快手喇!

 

 

Duck & Waffle
地址:中環金融街8號國際金融中心商場 1樓1081舖
電話:2267 6338
營業時間:星期日至四:08:00-22:30、星期五至六及公眾假期:08:00-11:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *