【漫遊港島品茶「打書釘」 隱世博物館聽原音唱片】Local自駕遊

周末梗係想放慢步伐、Chill吓啦!如果提起慢活,你又會想做咩呢?歎茶?睇書?聽音樂?咁就啱晒喇,就由中環出發,同大家一齊探索吓熱鬧港島區下嘅淨土啦!

 

中環茶寮慢活品茶

放假想享受吓寧靜嘅時光,就不如去中環、佔地2000呎嘅汴京茶寮慢慢歎茶啦。全店以日式簡約茶室設計,環境開揚寬敞,而且早晚嘅陳設都唔同㗎!嚟到呢度梗係要試佢哋高質嘅茶啦。凍飲嘅八女煎茶茶葉比較嫩綠,係店主直接向農夫購買,可以確保到茶葉嘅質量。呢款透過冰鎮過程為茶降溫,茶葉經過三泡令冰茶唔會因為冷凍而變淡,入口順滑而富茶香。

店內仲有All Day Lunch同Dinner Set㗎,必試呢度嘅茶漬飯同茶凍。呢款高菜白魚味茶漬飯食落清新有魚香;茶凍就帶有桂花香同淡淡嘅玫瑰香,質地Q彈仲係低糖添,入口唔覺甜膩。另外喺嚟緊三月,逢星期六、日都舉辦咗茶道體驗活動,想參加嘅朋友就留意佢哋專頁喇!

 

汴京茶寮
地址:中環雲咸街38號
電話:從缺
營業時間:星期一至日:10:30-20:00、21:00-01:00 

 

灣仔月街小茶店

嚟到灣仔都有茶店好推介!呢間BASAO tea正正就係茶葉品牌BASAO嘅首間茶店,有茶師現場即席泡茶,除咗傳統茶飲之外,仲有新派健康茶飲俾你揀添。

呢度同樣除咗茗茶之外,仲有用茶製成嘅甜品,阿里山烏龍蛋糕卷清香淡雅,如果配茶仲可以揀埋大吉嶺霖吉雅莊園春摘,成熟度比夏天採摘嘅茶葉輕啲,帶花香味,成個配搭好lady添。喺度歎茶食蛋糕都係生活上嘅小確幸!

 

BASAO tea
地址:灣仔月街17號地下
電話:2952 3313
營業時間:星期一至日:11:00 – 20:00

 

全港第一間人文圖書館「打書釘」

由於疫情關係,康文署轄下嘅圖書館都暫停開放,想睇書嘅朋友就可以去銅鑼灣嘅打書釘喇!呢間私人圖書館有過萬本以文、史、哲、文化研究、城市研究等為主嘅藏書,係由5位本地退休教授捐出,有心人就將藏書整理好,以圖書館嘅形式開放俾大家上嚟「打書釘」,同大家分享閱讀嘅樂趣!不過呢度啲書就唔可以外借嘅,只要俾HKD300訂金整閱讀卡就可以喺度無限時、無限量咁自由閱讀,閱讀卡亦可以隨時退回添。而呢度始終都係公共空間,自己上嚟都要小心注意個人衛生呀。

呢度更會不定期同唔同嘅單位合辦藝文分享會、工作坊、音樂會等活動。雖然最近期因為疫情而暫時停辦活動,但有興趣嘅朋友就記得留意佢哋官方網頁嘅最新消息喇!

 

打書釘
地址:銅鑼灣恩平道54號3樓
電話:從缺
開放時間:星期二至日:12:00-19:00
訂金:HKD300 (可隨時退回)

 

樓上唱片博物館

想慢活梗係諗起聽音樂,咁就不妨走上銅鑼灣商廈嘅唱片博物館,了解多啲以前嘅音樂啦。店主James Tang收藏一系列極珍貴嘅唱片母帶、頭版,喺度有機會欣賞到唔同年代嘅原版音樂,音樂迷絕對唔可以錯過呀!想試吓俾大量嘅黑膠唱片、CD包圍住嘅感覺,陶醉喺音樂當中,嚟呢度就啱喇!

館內亦有收藏各年代嘅留聲機、音樂播放器、錄音機等器材,令人眼界大開!不過去之前記得要打電話預約呀。

 

Sam The Record Man唱片博物館
地址:銅鑼灣耀華街39號南慶坊12樓全層
電話:2892 1681
開放時間:星期二至日:13:30-20:30
費用:HKD200

 

至Chill海鮮蠔吧

睇完書、聽完音樂,肚仔開始餓又係時候食晚餐,一於揸車去天后蠔吧食蠔啦!由唱片博物館出發,大約十分鐘車程就會到位於天后同炮台山之間嘅So Oyster

呢間西式小店主打各款生蠔同新鮮海鮮,生蠔有成6-8款選擇,每個星期三次空運到港。而呢度有蟹缸養住鮮活嘅麵包蟹,即叫即劏夠晒新鮮,仲有其他特色西餐食添。呢個地段人流唔多,反而可以慢慢歎。

 

So Oyster
地址:天后威非路道21號第二十一威菲路酒店地舖
電話:2763 0838
營業時間:星期一至日:12:00-15:00、18:00-23:00

 

You may also like...

Leave a Reply

Your email address will not be published. Required fields are marked *