【保衛家人健康打好抗疫戰 中醫師6招健脾強肺】懶健康貼士

上期請營養師提供咗三餸一湯抗疫住家菜食譜,今次就搵嚟中醫師梁尹倩 Cinci EC同大家講吓中醫角度點樣健脾強肺,仲教大家兩款簡易嘅強身飲品添。咁樣中西合壁,雙管齊下一定可以養好身體抗疫啦!

你會推薦邊啲潤肺強肺湯水同食材呢?大家要留意咩禁忌呢?

雖然話潤肺強肺可以增強身體正氣,對抗外邪入侵,但係最重要都係根據個人體質調節最有效。大部分補氣食材都係溫補類,好似人參、黨參、北芪、大棗等;如果你屬於有熱氣,已經出現咽喉痛、口瘡、暗瘡、便秘等偏熱症狀,再食呢類溫補食材就會愈補愈上火,加重本身症狀,所以要先清熱。其實都可以食啲屬性平和嘅健脾補氣食材,例如薯仔、淮山、小米、米等粗糧,仲可以適當地添加喺湯水。另外亦建議每日飲用米水,強身防病。

大人同小朋友嘅用料有冇唔同呢?

大人同小朋友都要根據自己體質調補,除非已向中醫師查詢,否則一般嚟講小朋友都要避免屬性溫補性太強嘅藥材,例如鹿茸、高麗參等。另外亦建議避免飲食生冷嘢,可以每日飲用米水健脾補氣。

養脾係基本功!

其實《黃帝內經》提到:『邪之所湊,其氣必虛』,即係身體有足夠嘅正氣就唔怕邪氣乘虛而入。而中醫理論中肺主氣,包括主呼吸之氣及一身之氣,所以亦稱『肺為氣之本』。一般肺氣不足嘅人都容易感染呼吸道疾病,出現經常反覆感冒、氣管敏感、怕寒怕風、多汗、容易疲倦。每逢冬天或當流感、傳染病肆虐嘅時候佢哋都最易受感染,亦容易變成細菌散播嘅源頭。

不過除咗補肺氣之外,其實養脾更加係基本功。當人嘅脾氣不足就唔能夠將食物轉化成身體可以吸收嘅營養,身體會較虛弱。中醫理論認為『脾胃為後天之本』、『脾為氣血生化之源』,養好脾胃等於養好消化系統,為健康打好基礎。

6個習慣健脾強肺

1. 朝早7至11點係脾胃經行緊嘅時間,如果每日呢個時候再飲米水強化肺脾氣就可以再吸收得好啲。
2. 每日1杯檸檬水,強身防病。
3. 避免生冷寒涼食物,例如雪糕、凍飲、刺身、沙律等未經煮熟嘅食物。
4. 適量進食粗糧,例如蕃薯、米、薯仔等,有助健脾胃,唔好亂戒米飯。
5. 多食新鮮水果吸收維他命。
6. 多休息,睡眠充足避免熬夜。

強身補肺食譜

簡易強身米水 – 補中益氣、健脾滲濕 | 屬性平和
材料:紅米2湯匙、白米半湯匙、生薏米半湯匙
做法:將材料洗淨,鍋內加入約800-1000毫升水,放入全部材料,以武火煲滾後調文火煮20-30分鐘就飲得。
注意:
– 米水容易變壞,建議每日新鮮煲好,飲完唔好擺過夜。
– 一歲以上小兒可由每日飲用60毫升開始。
– 孕婦可以唔落薏米。
– 糖尿病人飲用前要先諮詢營養師。

 

紅蘿蔔蘋果薯仔太子參湯 – 補脾養胃、有益肺氣、強身防病 | 屬性平和
材料:紅蘿蔔1根、蘋果1個、薯仔2個、鮮淮山1根、太子參15克、蜜棗2枚
做法:
1. 所有材料洗淨,蘋果去芯切塊;紅蘿蔔、薯仔去皮切塊;鮮淮山去皮切塊。
2. 鍋中加入約2500毫升水,放入全部材料,武火煲至水滾後調文火煮約1.5小時,最後落少少鹽調味即可。
注意:感冒未清者不宜飲用,感冒或流感人士要痊癒後先可以飲用呢類湯水養生!

 

梁尹倩 Cinci EC
香港註冊中醫,修畢美國佩柏戴恩大學工商管理學士、香港大學中醫全科學士及中文大學針灸學理學碩士,《飲湯》系列作者及兩孩之母。

You may also like...

Leave a Reply

Your email address will not be published. Required fields are marked *