【知名花店逆市擴充餐飲空間 藝術蛋糕配花香特飲】Gary Kwok Flowers & Cafe

鮮花控注意!名花藝師Gary Kwok設立嘅同名花藝品牌最近逆市擴充,同一空間除咗有花藝工作室之外,更開埋夢幻感十足嘅花系cafe添!呢間Gary Kwok Flowers & Cafe主打各款花香特調飲品同埋精緻嘅藝術蛋糕,仲有一系列多士、三文治等輕食,快啲嚟沉醉喺呢個「花花世界」入面啦!

店舖中央售賣唔同嘅生活精品,全部都係花藝師Gary親自喺外國搜羅返嚟。門口嘅左邊係花店同埋花藝工作室,而右邊就係cafe喇!全店以唔同花卉裝飾,呢啲花藝佈置仲會每個月更換,keep住有新鮮感。

以玫瑰花瓣點綴嘅One Good Minute(HKD46)就係呢度必飲嘅招牌咖啡,混合咗玫瑰花同薰衣草,花香味突出,嚟到呢度又點可以唔試吓呢?!飲咖啡梗係要配埋啲輕食啦,今次就揀咗三款多士推薦俾大家,其中一款更係最近研發出嘅新品添。左面係岩手縣蟹肉牛油果多士(HKD40/2件),軟腍嘅牛油果混和調咗味嘅蟹肉,味道有啲似甲羅燒,都幾鮮味!而中間嗰件照燒牛肉本菇多士(HKD36/2件)就比較濃味,面頭鋪滿芝士,加入照燒汁嘅牛肉烤得亦夠香口。

小編特別推薦慢煮汁燒三文魚本菇多士(價錢待定),呢款就係cafe嘅最新出品喇!汁燒三文魚肉質嫩滑又入味,仲有香甜嘅洋蔥喺裡面添。

想清新啲就可以試吓Homemade Jasmine Sakura Tea(HKD46),入面加咗自家製櫻花漬,用三種糖漬過嘅櫻花有獨特嘅清甜味,再混入茉莉花茶都唔會過甜。而且攪拌嘅時候啲花瓣仲喺茶中飄搖,好夢幻呀!

嚟得呢度,當然唔可以錯過咁精緻嘅藝術蛋糕。呢款奶白色帶珠光嘅球狀蛋糕,賣相成粒珍珠咁,唔怪得會命名為Pearl(HKD58)啦!

敲碎外層嘅白朱古力皮,裡面原來係柚子同熱情果味嘅慕絲加上綠茶味蛋糕,玩得又食得!

呢款雲朵蛋糕Daydream(HKD48)係獨家設計嘅蛋糕款式,嚿軟綿綿嘅「雲」用咗棉花糖做外層,裡面就係濃濃嘅伯爵茶慕絲蛋糕。如果鍾意果味啲,另外有白色莓果味嘅Sweet Dream(HKD48)可以揀。

淡紫色嘅Princess Taro(HKD38)係少有嘅芋頭味蛋糕,面頭係用台灣大甲芋頭打成嘅芋頭蓉,配埋濃郁嘅芝士蛋糕,味道幾新穎。

除咗輕食同蛋糕之外,仲可以試吓呢度嘅手工曲奇。Assorted Homemade Cookies(優惠價HKD30/包)有得一次過試勻唔同口味喇,飲住咖啡食件餅特別Chill呀!

呢度連Take Away嘅外賣杯都有精心設計過,左邊嘅熱飲杯呈現出成間cafe嘅面貌,好有美感;而右邊嘅凍飲杯就印有花形Logo,係cafe代表性嘅標誌。

 

Gary Kwok Flowers & Cafe 
地址:灣仔皇后大道東183號合和中心17樓1706-1711號舖
電話:8200 9226
營業時間:星期一至日:09:30-19:00

You may also like...

Leave a Reply

Your email address will not be published. Required fields are marked *