【人生必食:朱古力專賣店推介 搜羅東南亞甘甜滋味】人生必食

無論就咁食,定係整成唔同嘅製品,朱古力都有一種令人難以抗拒嘅魔力!想知朱古力可以有幾千變萬化,不如睇吓東南亞唔同嘅朱古力專賣店,有啲咩特色值得大家去朝聖啦!朱古力控仲唔快啲bookmark定?

 

新加坡The Dark Gallery

朱古力控注意!呢間朱古力專門店The Dark Gallery喺新加坡嘅人氣度超高,有成三間分店。佢哋招牌嘅朱古力手工雪糕有八種咁多,分咗黑白朱古力、唔同產地同濃度,最特別係有埋純素朱古力雪糕,連素食嘅朋友都照顧埋添。

除咗雪糕之外,呢度仲有好多以朱古力做主題嘅甜點同飲品,其中FROZEN S’MORES(約HKD52)以炙燒過嘅棉花糖包住80%黑朱古力雪糕,冰火交融,朱古力味好濃郁甘香添。另外佢哋嘅手工朱古力款式夠多又夠晒吸睛,買嚟自己食定送俾人都咁開心啦!

 

The Dark Gallery
地址:107 North Bridge Road, Singapore
電話:+65 6908 4086
營業時間:星期一至日:10:00-22:00

 

台灣「Tree to Bar」得獎精品朱古力

原來近近哋台灣都有土生土長嘅可可果㗎!而呢間福灣巧克力係由台灣首位國際認可朱古力品鑑師創立,更係全球少有嘅「Tree to Bar」朱古力專賣店添。所謂「Tree to Bar」係指由種可可樹至製成朱古力一條龍嘅生產模式,咁樣就可以更完整地保留朱古力嘅本土風味喇!而佢哋嘅精品朱古力更多次得到世界最佳朱古力獎添,好似呢款「台灣一號屏東70%巧克力」(約HKD77)咁,同樣都會有唔同濃度俾你揀,連濃度100%都有㗎。想體驗精品朱古力與眾不同嘅味道,第時去台灣就記得去尋覓吓喇!

 

福灣巧克力 (本店)
地址: 屏東縣東港鎮大鵬路100號
電話:+886 8 835 1555
營業時間:星期一至日:09:00-18:00

 

泰國曼谷Mika Pâtisserie

曼谷甜品店Mika Pâtisserie嘅軟心朱古力蛋糕又係不得不朝聖嘅邪惡甜品!Chocolate Truffle Cake(約HKD80/半個;約HKD144/全個)形狀四四方方,賣相唔算好特別,但原來內有乾坤嘅。內餡會因應唔同嘅溫度而有唔同嘅質感,常溫就係軟心狀態;凍食就似食緊生朱古力咁入口幼滑又厚實,朱古力味亦夠香濃;如果焗熱佢就有少少流心效果。選用嘅朱古力味道濃郁,仲帶有微微嘅花香同果香,一個蛋糕都有咁多層次,抵佢咁受歡迎啦!

 

Mika Pâtisserie
地址:ห้าง Emquartier ชั้น 4 ตึก Waterfall Sukhumvit Rd, Khlong Toei Nuea, Watthana, Bangkok 10110, Thailand
電話:+66 2 003 6626
營業時間:星期一至日:11:00-21:00

 

日本東京水果內餡朱古力

著名朱古力專賣店Jean-Charles Rochoux 喺東京分店不時會推出期間限定嘅水果朱古力,而呢種水果朱古力嘅內餡係以新鮮時令水果整成,同平時食開嘅水果朱古力有分別㗎。最近新出嘅士多啤梨朱古力(約HKD240)就將原粒士多啤梨包喺朱古力入面,咬開會食到濃香幼滑嘅牛奶朱古力之餘,仲有啖啖果肉添!不過要買到呢款朱古力都唔容易,因為佢只會逢星期六喺門市限量發售,記得去搶購喇!

 

Jean-Charles Rochoux  Tokyo
地址:東京都港区南青山5丁目12-3 NOIRビル 1F
電話:+81-03-6805-0854
營業時間:星期一至日:11:00-19:00

 

香港本地手工朱古力主題cafe 

講咗咁多間外地嘅朱古力專賣店,返返嚟香港先!呢間本地朱古力小店JOL Cacao由擺市集發展到開Café,自家烘焙同研磨可可豆保證質感幼滑又濃味。呢度有各式手工朱古力製品,好似朱古力飲品(HKD26起)、可可茶(HKD16)、手工朱古力火鍋(HKD98)、朱古力牛角包(HKD20)等款式,如果想訂造特別嘅朱古力口味都可以同佢哋傾㗎。未去到外地,朱古力控留喺香港都可以品嚐到高質朱古力。

 

JOL Cacao
地址:觀塘成業街19-21號成業工業大廈2樓15室
電話: 6558 7880(WhatsApp)
營業時間:星期一至五:12:30-14:30,18:00-20:00,星期六:12:30-15:30(星期日休息)

 

You may also like...

Leave a Reply

Your email address will not be published. Required fields are marked *