【疫情下自製「15小時登機之旅」 澳洲家庭還原歐遊樂趣】網上熱話

因為疫情冇得周圍飛?呢個澳洲家庭就話你知唔係喇!佢哋模擬咗成個飛行體驗,喺屋企嘅客廳打造咗一個專屬嘅飛機機艙,由登機前嘅安檢、飛機上嘅餐飲服務,全部細節都一絲不苟。連登機證、飛機餐單等等都自製埋,驟眼睇仲非常逼真!在家隔離都可以「搭到飛機」,成家人喺呢個「飛行之旅」亦玩得好開心添。想睇Russell一家點樣喺疫情下自娛,就要睇落去喇!

事源呢個Russell澳洲家庭本來就計劃好一個長達11個星期嘅歐遊之旅,點知就受到疫症影響而取消咗。喺失望之際就決定一於自製航班,搞返個在家旅遊版!

搭飛機梗係要有登機證啦。睇真啲,原來呢張登機證係自製嘅,都呃得吓人喎!

上機之前過咗安檢嗰關先!俾三個仔女玩埋角色扮演,又似模似樣喎。

個個都坐定定,連頸枕、娛樂設備都準備好晒,正式開始「15小時飛行之旅」喇!

起飛後,先將預備好嘅零食派俾乘客先,再附上飛機餐單一張。

搭長途機最期待嘅飛機餐出現喇!有Burger、薯條、汽水仲有甜品咁,望落都幾豐富喎。

雖然個「飛機餐」冇乜特別,但佢哋依然咁Enjoy呀,睇吓佢哋都食得幾滋味~~

食飽飽就最好喺機上眠一眠啦!

「多謝乘搭Lounge Chair Air……」話咁快就要落機喇,睇呢個乘客面上嘅笑容,應該都幾滿意呢間「航空公司」嘅Service啦。

呢個澳洲家庭充分表現咗「The best budget is no budget!」,網民大讚澳洲爸爸有創意之餘,仲建議佢哋做戲做全套。繼「登機之旅」後,不如再改建埋酒店房繼續個旅程咁話喎。其實喺屋企悶悶哋,咁樣自娛吓都幾好!

 

圖片來源:Kirsty Russell@Twitter

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *