【退休復出中環開天貝素食店 「香港人自己做素漢堡」】天之樂素食

你想退休之齡做啲咩?年屆77嘅徐師傅就選舉再開餐廳!喺中環以「天貝素食」開咗天之樂素食,為嘅係咩?「為興趣、素食同解決糧食問題。好多年輕人食素,好快一、兩個鐘就餓,咁食咗等於冇食。但係天貝係高纖低脂,食咗會好滿足,You never hungry。而且早廿年喺美國大豆協會已經講天貝呢樣大豆發酵食物係Superhero,營養價值好高。」徐師傅60年代入行,喺大餐廳做過,自己都開過唔少餐廳,即刻睇吓佢點發自製嘅天貝炮製唔同菜式啦!

小店係外賣形式,但大部分都係HKD48,而今日例牌仲係HKD35起,喺中環嚟講真係好抵食!

呢啲天貝漢堡扒睇落好乾?其實食落好軟滑,仲有少少大豆啲粒粒,有味道亦有質感。「平時用豆腐整素食其實唔會入味,但天貝就可以喇」唔怪得無論整成漢堡扒、切片或者打爛做「肉醬」,佢嘅味道都可以跟住菜式而有變化啦。

天貝素漢堡(HKD48)有原味同咖喱味可以揀,不過入面都落咗蘋果蓉同蕃茄,口感同味道都幾fresh㗎。仲會跟埋落咗兩款沙律菜嘅蘋果蓉沙律,食晒都真係幾飽;加上焗過嘅穀物麵包,成分都好有質感!

天貝素肉醬披薩(HKD70)大約8-9吋,落咗大量蕃醬、素芝士同藜麥。口感輕盈唔膩,茄味好濃郁,唔講唔知自己食緊素喎。

仲會送埋是日糖水或湯(單點HKD10),不過送完即止。徐師傅話佢哋嘅糖水同湯都比平時落double分量,可以話比主食更落足心機添。

焗天貝素肉醬土豆(HKD48)嘅味道同咬口都好似食緊用真肉整嘅肉醬,可以配藜麥飯、意粉或湯(加HKD10)其中一款,令小編又要講多次真係好抵囉!

天貝香辣鷹嘴豆秋葵意大利麵(HKD48)就好啱鍾意惹味啲嘅朋友喇。入口微辣有鑊氣,加上切成片嘅天貝、秋葵、鷹嘴豆同藜麥呢啲營養價值高,又唔同口感嘅餸料,絕對對得起佢嘅價錢呀!

 

天之樂素食
地址:中環利源東街6號地下
電話:3611 6056
營業時間:星期一至五:10:00-16:00[有時會收17:00] (星期六、日休息)

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *