【西灣河重量級酒吧餐廳 爆汁醬燒牛肋骨×芝味牛堡】The Blind Pig

如果一間酒吧餐廳嘅食物重量級大大份,又有得睇運動比賽,同朋友喺度食嘢係咪更relax呢?西灣河海旁嘅The Blind Pig就集齊呢啲元素,餐廳菜式參考咗美國、英國、加拿大等地嘅特色;而呢度嘅大電唔係只播球賽,會有唔同類型嘅運動㗎,無論味覺定視覺都有多重享受。

餐廳環境開揚,陣中有陣陣海風吹過,帶埋寵物嚟嘅朋友都可以坐近門口位置。

呢個Whole Roasted Cauliflower 烤原個芝士椰菜花(HKD118)佈滿芝士,睇落極度邪惡?!其實椰菜花入口非常juicy多汁,反而中和咗芝士嘅鹹膩又不失香口。

而另一款邪惡小菜就係Crispy Pork Knuckle Finger 招牌豬手脆條(HKD128)!豬手起咗骨食得方便之外,亦醃得好入味,炸到皮脆肉彈口感唔錯,想開胃啲又可以蘸埋甜辣醬。雖然睇落細細碗,不過食吓一條,食吓一條都唔可以好快清咗佢。

Classic Patty Melt芝士牛堡三文治配薯條(HKD160)分量都算多,烘過嘅多士夾上嫩滑嘅牛肉同雙層熱溶咗嘅芝士,惹味又唔會過鹹。現埋大量炸薯條,男士自己食一份都夠飽㗎。

Pan Seared Sea Bass Fillet 香煎海鱸魚(HKD178/half,HKD298/whole)清甜鮮味嘅湯汁令你入口好舒服,加上大量爽口嘅蜆肉同大蝦,加埋煎香咗都依然嫩清嘅鱸魚一齊食,口感幾豐富喎。

如果你係食肉獸就唔可以錯過Slow Cooked BBQ Beef Short Rib慢煮醬燒牛肋骨(HKD238)!面頭有少少檸皮中和醬燒嘅肥膩感,而慢煮過嘅牛肋骨肉質非常軟腍,切一大嚿咬仲有爆肉汁嘅感覺添。

唔想煩揀咩又可以開心share呢份Roast Beef Family Style 烤肉分享拼盤(HKD428/週末限定),有齊烤肉、芝士椰菜花、烤薯、甘筍同麵包,當Tea Set咁食都夠晒豐富。

或者叫份以香蕉蛋糕為概念嘅Banana Bread Pudding 香蕉麵包布甸(HKD78),雖然配咗拖肥醬同雲呢拿雪糕,但蛋糕質感嘅香蕉麵包布甸幾清香,怕甜嘅朋友都食到。

想飲返杯可以試吓The Blind Pig嘅特式雞尾酒Catch me if you Can(HKD88/右),帶香甜嘅果味幾fresh。仲有帶麥香嘅TPB Larger 自家精釀生啤(HKD60/360ml,HKD160/1.25L)同埋Dragon Water啤酒(HKD48)都值得一試㗎。

 

The Blind Pig
地址:西灣河鯉景灣蘇豪東B期太康街45號地下B12-14A舖
電話:2707 0002
營業時間:星期一至四:11:30至夜深,星期五至日:10:30至夜深

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *