【經典零食品牌大玩花臣 變奏版新品形象反轉】人生必食

有冇留意到平時食開嘅零食原來識得變身嘅呢?!各大零食品牌喺自家經典零食嘅基礎上,不時都會大玩花臣,為大家注入新鮮感。小編今次就幫零食控搜羅到一大堆創意十足、估佢唔到嘅變奏版零食新品,雖然大部分都未必可以喺香港買到,但Bookmark定,第時見到就記得買嚟試吓喇!

 

麥提莎朱古力脆餅

平時食嘅麥提莎都係一粒粒嘅,今次推出嘅新品就係一塊塊嘅麥提莎朱古力脆餅,好似將麥提莎壓扁咗咁, 食落既有濃郁嘅牛奶朱古力味,又咬到粒粒麥芽脆米,咁樣嘅新品就更有新鮮感啦!

 

銷售點:韓國7-11

 

Oreo「朱古力批」

Oreo嘅產品除咗喺內餡有唔同嘅變化之外,韓國7-11最近嘅新品仲喺餅乾嘅外層搞啲新意思。喺傳統嘅Oreo餅度淋上黑、白朱古力醬,俾朱古力封住成塊Oreo,將Oreo變成好似「朱古力批」咁,朱古力控就啱晒啦!

 

銷售點:韓國7-11

 

HERSHEY’S扭紋雪糕筒

人氣朱古力品牌HERSHEY’S經常推出唔少以自家朱古力做主題嘅食品,今次同樣喺韓國7-11就有得賣民款朱古力雪糕新品,朱古力同雲呢拿雪糕扭紋,啖啖都係品牌獨有嘅朱古力濃香。

 

銷售點:韓國7-11

 

日本波子汽水糖雪條

由細食到大嘅樽裝波子汽水糖應該大家都唔陌生,但呢款咁經典嘅糖最近就變身成冰品喇。淺藍色嘅雪條正正係熟悉嘅波子汽水味,由雪葩質地嘅外層包住入面較Creamy嘅內層,入面更內藏粒粒波子汽水糖添。

 

銷售點:日本便利店

 

明治阿波羅士多啤梨朱古力乳酪

明治其中一款經典零食「阿波羅士多啤梨朱古力」相信大家都唔陌生,原來已經推出咗50年喇!咁開心梗係要慶祝吓啦,最近特別推出阿波羅士多啤梨朱古力同款口味嘅乳酪新品。呢款限定嘅杯裝乳酪(約HKD15/2杯)貫徹朱古力同樣嘅組合,上層係酸甜濃郁嘅士多啤梨乳酪兼有果肉,下層就係幼滑香濃嘅朱古力醬,見到一定要試呀!

 

銷售點:全日本便利店同超市

 

原條繽紛樂雪條

放大咗嘅繽紛樂?!kinder推出嘅冰品其中有款十足十繽紛樂嘅樣,仲要係原條上,無論賣相同味道都非常相近,但就多咗一陣雪糕嘅冰涼感。同期亦有推出幾款以皇牌朱古力演變而成嘅雪糕冰品添!

銷售點:外地各大超市、便利店

 

Skippy花生醬雪糕

人氣花生醬品牌Skippy踩入雪條界,推出一系列Skippy花生醬主題冰品,更喺香港有得賣添!繼早前有花生醬朱古力雪糕批(HKD19.9)同特濃花生醬甜筒(HKD21.9),最近更有特濃花生醬雪糕三文治(HKD19.5)登場。三款雪糕都各有特色,食落都有唔同口感同風味㗎,但一樣嘅係佢哋嘅花生醬都同樣咁突出。梗係要拉埋身邊鍾意花生醬嘅朋友一齊試啦!

 

銷售點:全港Circle-K

 

Crossover 2合1雪糕

點解外國出品永遠都可以咁邪惡?歐美雪糕品牌Breyers將唔同嘅經典零食口味拎嚟做雪糕都不特止,仲將佢哋Crossover,破格推出2合1嘅家庭裝雪糕,真係引死人咩!依家除咗歐美地區買到之外,更引入到台灣,唔知幾時嚟到香港呢?

雪糕口味都有唔少選擇,其梗係唔少得OREO×Chips Ahoy!朱古力曲奇味呢啲大熱之選啦!

 

銷售點:歐美各大超市、台灣Jasons Market Place

 

M&M”s、SNICKERS融入花生醬

以為花生醬得一隻味?咁你就錯喇!荷蘭嘅食品公司Mars就推出咗同M&M和Snickers兩大品牌Crossover嘅花生醬,喺濃郁嘅花生醬入面加埋M&M和Snickers朱古力,令花生醬嘅味道層次更加豐富。用佢哋嚟搽麵包就正喇,仲會有朱古力碎增加口感添!

 

銷售點:歐美各大超市

 

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *