【工廈覓食罕見家傳娘惹菜 蟹肉球魚肚湯大節必備】星色娘惹風味

工廈食堂就唔一定食快餐嘅,喺葵芳嘅星色娘惹風味就可以品嚐到傳承三代家族食譜嘅娘惹菜喇!因為娘惹菜都由每家每戶傳承自己嘅食譜,呢度嘅負責人兼主廚Susanna Toh由七歲就入廚。嫁嚟香港十幾年都好少食到香菇魚丸肉脞撈麵、螃蟹海鮮肉球魚肚湯、酸菜鴨湯等充滿家鄉風味嘅傳統菜式,一於開舖整俾自己食之餘,亦將特色家鄉菜推廣俾更多人識。

入到嚟都有別於平時工廈飯堂嘅環境,感覺都似去咗餐廳㗎。

雖然喇沙都係娘惹菜嘅主打之一,但既然呢度搵到傳統菜就梗係試咗先啦!Susanna Toh話傳統嘅味道會好濃同偏辣,初開業嘅時候發覺香港人唔係好食到,所以都一路調整緊分量。先講呢碗新加坡獨有嘅香菇魚丸肉脞撈麵(HKD55),以自家調味浸冬菇,再用冬菇汁加入香料煮肉末同撈麵嘅汁底,入口唔止香,仲融合酸、甜、辣嘅味道層次添。

以前睇粵話殘片,如果過大節、喜慶或生日都會斬料,甚至斬鵝髀,而娘惹菜就會炮製螃蟹海鮮肉球魚肚湯(HKD60)呢款手工菜!自家混合蟹肉、乾蔥等用料手撻肉丸,質感彈牙用料足,愈食愈有辣勁幾惹味,歎埋爽口入味嘅魚肚同湯底都令人好滿足㗎。午餐可以配飯或米粉,而下午茶時段可以單點酥炸螃蟹海鮮肉球(HKD25/3粒,HKD48/6粒)

今個月即將推出嘅娘惹菜名湯酸菜鴨湯(價錢待定)一樣幾乎家家戶戶都會煲,尤其天熱時飲更加消暑。以酸菜、酸梅、蕃茄、鴨肉煲起碼3-4個鐘,將鴨肉嘅精華滲晒入湯底。味道酸爽開胃,喉嚨感覺好舒服,啱晒夏天飲呀!

星色肉骨茶(HKD55)好似同平時食嘅唔同?湯底都係有藥材味嘅,但唔會濃到好似飲藥咁,反而辣勁幾出色喎。所以最唔同嘅就係加咗豬肚同乾蔥,少咗豆卜;不過同肉條一樣煲到好軟腍入味,配飯一流!

招牌藍豆花椰漿飯(HKD60)以藍荳花浸水,用佢幫白飯上色,寓意吉祥。配埋雞蛋、蝦醬雞翼同埋偏甜辣嘅沙嗲雞髀肉串燒,一定令你飽肚。

14:30-16:00下午茶時段,逢星期一供應嘅班蘭戚風蛋糕(HKD35/件)用成40塊班蘭葉製,香味非常濃郁!特別用新加坡蛋製作,有蛋香仲好鬆軟濕潤,邊食唔飲水都得喎。

想邪惡啲就有咖椰吐司(HKD35),搽上帶椰香嘅自家製咖央醬,夾埋牛油口感更加滑。

 

星色娘惹風味
地址:葵芳大連排道162-170號金龍工業中心2期2樓G室
電話:2636 0668
營業時間:星期一至五:11:00-17:00(16:00截單)

You may also like...

Leave a Reply

Your email address will not be published. Required fields are marked *