【新開韓餐館自製手工Pizza 香脆鹹蛋炸雞落足料】My Ahjussi

大角咀有唔少美食,最近喺小巷新開嘅My Ahjussi就以Fusion韓國菜做賣點,設計咗唔少惹味嘅邪惡菜式。其中有香脆鹹蛋炸雞,超長鰻魚漢堡等,仲好足料大份喎。

負責人兼大廚阿Tim已經入廚十幾年,雖然煮開歐洲菜,但自己都鍾意韓國菜式。一入嚟門口設計到好有小型婚禮feel?因為佢想餐廳第日可以用嚟做求婚同小型Party場地。

餐廳所用嘅韓式醬料同餐具都由韓國入貨,泡菜五花腩飯 (HKD68)煮得好入味,泡菜同五花腩分量差唔多一比一添。

韓國菜點少得韓式炸雞呢?!呢款加咗港式元素嘅黃金鹹蛋炸雞(HKD118/6件,HKD218/12件)好鹹香惹味,外皮脆到咬落嗦嗦聲,仲好啖啖肉㗎。

卡邦尼炸雞(HKD98/6件,HKD178/12件)可以話係呢度獨創!因為卡邦尼醬汁令口感creamy同更加有肉感之外,入面仲加咗泡菜,令口感更加特別。

呢度嘅手工Pizza有6款,想堅持韓式感覺可以揀韓式泡菜牛肉薄餅(HKD118)。唔好以為就係鋪大量芝士、泡菜、牛肉、蔬菜等材料上去咁簡單,餅底用12個鐘自然發酵㗎!阿Tim話想俾大家食到真係無添加嘅味道,所以要長啲時間、每日只係整到50份都唔介意。

呢度仲有西式選擇嘅,鰻魚漢堡(HKD128)嘅鰻魚唔止超長,入口仲好彈牙唔易爛。配埋炒菇同炸薯條都咪話唔飽。

軟殼蟹忌廉汁意粉(HKD98)嘅軟殼蟹好脆口,夠鹹香又唔覺得油膩喎。意粉亦加咗菇一齊煮,都幾有誠意吖。

士多啤梨乳酪(HKD42/單點,HKD20/跟餐)伴雪糕,入口幾清爽喎,亦唔會好甜膩,幾啱熱辣辣嘅天氣飲。

 

My Ahjussi
地址:大角咀大全街39號地舖
電話:9846 7315
營業時間:星期一至日:12:00-21:00

You may also like...

Leave a Reply

Your email address will not be published. Required fields are marked *