【人氣扒房新店踩入沙田 限時$58牛肉飯+增設早餐】Top Blade Steak Lab

由何文田開到銅鑼灣,人氣扒房Top Blade Steak Lab都係地舖,今次開第三間分店終於走入商場喇。負責人之一Oscar話:「今次商場主動搵我哋,俾咗個相宜嘅租金,咁啱我哋都想開分店就試一試。呢度比另外兩間店大好多,其實都係一種挑戰。我哋依然想推廣Flat Iron牛扒俾更多人知,因為一隻牛呢個部位只係開到5-7件扒,少有而質地同肉味都幾出色,加上橫切同直切口感都唔同㗎。」。主餐牌變化唔多,但新店多咗早餐;而配合夜晚禁堂食安排,全線暫時增設HKD58起嘅外賣餐牌添。

新店大好多,仲有多人卡位俾多幾個人一齊坐。

Flat Iron佔成隻牛4%,油脂少啲但肉質幾軟腍。出面好少餐廳推介呢個部位,想試就嚟呢度啦!

沙田店增設早餐,有沙嗲牛肉出前一丁羅宋湯牛肉通粉(各HKD58)五香肉丁出前一丁(HKD48)三款,全部都配牛角包、炒滑蛋同冷熱飲品。不過咪以為早餐會hea啲,入面嘅牛肉用返Flat Iron解牛時切出嘅肉,半筋半肉好有咬口。沙嗲牛肉用沙嗲醬同沙茶醬煮之前,先醃甜少少,加入日式感覺,入口幾濃味同有花生香㗎。

蕃茄牛肉通粉嘅茄湯幾濃,又有唔少紅蘿蔔粒,用料好足呀!

配埋帶牛油香嘅牛角包同炒滑蛋,成個餐都幾豐富,又有港西fusion嘅感覺。

依家暫時推出外賣餐,方便大家速食同準備晚餐,HKD58起就有交易!

大阪牛肉飯(HKD58)絕對抵食!有大量半筋肉嘅牛肉粒,再淋上大量肉汁,味道鹹中帶甜幾有日式牛肉飯嘅感覺。

外賣同堂食都有嘅牛油果醬煎蛋打扁漢堡(HKD85)搽咗大量牛油果醬,而漢堡扒都用返Flat Iron嘅肉整成,入口有整清爽同邪惡嘅味道添!

鋸扒唔係晚市專利,依家都食到㗎。呢度將Flat Iron用三種整成,美國390日穀飼Prime級平鐵牛扒(HKD268)係肉質最好嗰款,話晒100隻牛先得10隻可以達到Prime級數!Oscar建議5成熟最juicy,如果覺得都係太生可以再幫你煎熟啲,呢個服務都幾貼心喎。而呢款扒仲有個特色,切嘅時候逆紋切會腍啲,順紋就有咬口啲,大家下次食可以試吓呀。

 

Top Blade Steak Lab
地址:新城市廣場一期地下108號舖
電話:2331 3253
營業時間:星期一至日:09:00-22:00

You may also like...

Leave a Reply

Your email address will not be published. Required fields are marked *