【法式鹹甜薄餅店進駐K11 必食煙韌朱古力Crêpe】Café Crêpe

加拿大過江龍Café Crêpe喺中環嘅首店開咗三年,佢哋主打法式薄餅,嚟緊8月29日第二分店會踩入尖沙咀添!呢度嘅Crêpe出名煙韌,即叫即整,而且有鹹甜兩食㗎。新店有限定口味嘅Crêpe同熱狗,即刻睇吓新品有幾吸引啦!


新店同樣可以堂食或者外賣,佢哋環鏡都唔錯㗎,仲有打卡able嘅外賣櫥窗可以影靚相添!

K11新店三款限定新品之中,有兩款係以特製朱古力法式薄餅皮整成,蒙地卡羅朱古力法式薄餅(HKD85[上])更加係期間限定,朱古力迷一定唔可以錯過!薄餅皮包住自家製榛子朱古力醬做內餡,而面層嘅朱古力波有榛子粒同雲呢拿威化餅,食落有超濃朱古力味,而且好脆口。另一款抹茶忌廉芝士配新鮮紅莓醬法式薄餅(HKD89[下])甜度適中唔膩,面層嘅法國新鮮紅莓醬就酸酸哋,開心果粒同麥片脆脆令口感好豐富!

第三款限定新品係法式巴黎熱狗(HKD58),用外脆內軟嘅法國長棍麵包加上脆皮法蘭克福香腸製成,中間除咗熱狗必備嘅醬茄醬同黃芥末醬,仲有多到流晒出嚟嘅芝士醬添。

小編仲試咗佢哋4款招牌鹹甜點,甜點有肉桂配甜酒及香草忌廉芝士(HKD79[上])有肉桂混合少少甜酒味嘅忌廉芝士,味道好夾又軟滑,頂層仲有提子乾做點綴添。另一款肉桂烤啤梨配鹽味焦糖醬法式薄餅(HKD79[下])肉桂味就冇咁重,反而有甜甜哋嘅焦糖味,啤梨食落幾有咬口。

兩款鹹點分別係牛油果、炒蛋配瑞士芝士薄餅(HKD85[上])瑞士芝士汁黑松露帶子薄餅(HKD125[下])。前者內餡有埋煙肉、菠菜同蛋黃醬,好啱當早餐食。後者嘅餡料超多,成個薄餅都有滿滿嘅帶子、蘑菇同白汁,啖啖都係帶子肉呀,兩款鹹食都好推介!

想邊食邊飲可以試吓薄荷青檸梳打(HKD44[左]),飲落好清新,炎炎夏日飲就啱晒喇!而抹茶黑朱古力冰冰樂(HKD48[右])微甜唔苦澀。

淺粉紅色嘅熱飲Ruby紅寶石朱古力(HKD48)好有少女心,口感好滑但味道偏甜,打卡一流!

Cafe Crepe(尖沙咀店)
地址:尖沙咀河內道18號K11購物藝術館地下G29號舖
電話:2899 2286
營業時間:星期一至日:10:00-22:00

You may also like...

Leave a Reply

Your email address will not be published. Required fields are marked *