【氣炸牛油果芝士腐皮卷 簡易減醣料理輕鬆瘦身】氣炸師
好多女仔都會為咗減肥而節食又或者食一啲原生食物,食到有幾清得幾清,但食到好厭嘅時候又可以點呢?其實可以試吓減醣,轉變食物比例減少攝取澱粉質,降低升糖指數,有飽肚感又唔使白烚咁唔落調味。今日氣炸師就會同大家整呢個氣炸牛油果芝士腐皮卷,一人分量所攝取嘅碳水化合物都只係5.37g,仲有來自肉同植物嘅蛋白質,牛油果又可以抗氧化,營養幾均衡㗎。
氣炸牛油果芝士腐皮卷
材料與分量:
豬肉片– 3-4塊
腐皮– 1包
牛油果 – 1個
芝士 – 適量
七味粉 – 適量
豉油 – 適量
油 – 適量
做法:
1. 用七味粉醃豬肉,牛油果切件備用。
2. 將腐皮打開掃上豉油。
3. 按次序將豬肉片、牛油果同芝士碎鋪喺腐皮上然後捲起。
4. 腐皮卷接位向下放入氣炸鍋,然後噴油。
5. 用180度氣炸8分鐘,反轉噴油再以同樣溫度及時間炸多次,完成!