【魚製品餐廳圓創業夢 深海魚製爽彈魚肉薯條】魚事者

鍾意食魚蛋粉又想創業嘅Hyvan,啱啱喺炮台山開咗以魚製品為題嘅餐廳魚事者。呢度以唔同形式呈現魚品嘅鮮味,打破你對魚品嘅概念,即刻睇睇吓有幾特別啦!

餐廳設計充滿色彩,完全抹走晒「魚蛋粉」嘅感覺呀!

主食有唔少魚麵麵食,黑白鴛鴦春卷魚麵 (HKD43)用上自家製春卷,淺色嘅係墨魚春卷,而深色嘅魚春卷就特別鮮味。你仲可以揀配用魚湯做底嘅白雪雪魚湯、紅卜卜麻辣湯、黃錦錦咖喱湯同埋清清地木魚湯,想要清純定惹味都冇問題啦!

呢度嘅撈麵款就有fusion感覺,芝士汁吉列豬扒魚麵撈(HKD58)嘅彈牙魚麵撈咗芝士汁都幾香,同香脆嘅吉列豬扒好夾。

蝦頭油炸蝦球魚麵撈(HKD63)將彈牙孖寶結合起嚟,如果唧埋青檸汁就會更濃味醒胃。

小食就必試炸魚無薯條(HKD28)佢同魚麵一樣,加入九棍、紅衫、門鱔、剝皮大眼魚等深海魚加時令魚整成,爽口得嚟好鮮味。而自家調配嘅醬汁可以任揀一款,有常見嘅松露醬、鮮味嘅蟹皇醬同用明太子加蟹籽整成嘅雙子醬添。

扮墨西哥魚皮(HKD33)就加入墨西哥元素,加入芝士、醬汁同蕃茄粒。記得趁熱食,放耐咗會腍㗎。

如果想試下午茶,下午茶A香煎雞扒+炸魚無薯條+魚莎莎(HKD38)就有齊炸魚無薯條同特製嘅「魚肉飯」,配埋嫩滑雞扒都好滋味。

或者港式啲可以試下午茶D邪惡五香肉丁炒滑蛋多士(HKD33),入面仲落咗花生醬,比平時嘅炒滑蛋多士更惹味。如果加配梳肝花茶(+HKD5),洛神花山渣雪梨茶、蝶豆花檸蜜茶等口味就可以清一清喉嚨喇。

而晚市限定嘅魚米粒粒(HKD78)就將魚蛋變成一粒粒嘅’Risotto’,用松露同芝士炒香,加埋大量蟹籽,鹹香又有咬口㗎。

 

魚事者 Fisholic
地址:北角炮台山宏安道18號威德閣地下14號舖
電話:3590 4930
營業時間:星期一至日:08:00-21:00

You may also like...

Leave a Reply

Your email address will not be published. Required fields are marked *