【$28起歎正宗日式烏冬 逾30款和風小食任你揀】俺流亭

將軍澳新開嘅日式烏冬主題店俺流亭由日籍廚師佐次田 禎主理,精心製作正宗日式湯烏冬、鐵板炒烏冬、關東煮同各種日式小食,選擇好多元化到好肉港式車仔麵咁。佢哋價錢好親民,又有港人鍾意嘅蕃茄湯底,甚至連鐵板飯都有!不過烏冬作為主打款式,今次就講多啲有咩選擇啦!

自選百搭烏冬(HKD28起)好似港式車仔麵咁有30款配料同5款湯底俾你自由配搭,湯底除咗常見嘅濃厚豚骨湯鰹魚醬油湯咖喱湯之外,仲特別調配香港人鍾意食嘅鮮香麻辣湯香濃蕃茄湯。小編就試咗濃郁香甜嘅蕃茄湯底配麻辣肉醬、炸芝士竹輪、小棠菜同炸白身魚柳,入口好惹味呀!

主廚特別推介嘅俺流亭招牌湯烏冬DELUXE(HKD98)有炸蝦、炸雞、鴨胸、壽喜燒牛肉、流心蛋、年糕福袋、雞肉同小棠菜等配料,一次滿足晒有選擇困難症嘅人!呢款分量十足,可以2個人share當下午茶食都得。

男盛炸雞鍋燒烏冬(HKD58)可以揀有火或冇火咁小鍋上菜,不過熱辣辣滾住食會令豚骨湯底愈來愈香濃,加上豆腐、本菇、外脆內嫩嘅炸雞等配料,真係豐富又滋味。

鐵板系列有炒烏冬同飯可以選擇,呢個一口牛鐵板炒烏冬(HK68)炒得夠晒香,條條烏冬都嗦滿醬油汁㗎!一口牛嘅油脂豐富,不過有埋炒野菜就冇咁油膩喇。

關東煮(HKD8-14)都有好多選擇俾,部分配料仲係日本直送添!比較少見嘅肉骨腸食落脆口有肉香;大根嗦盡鏗魚高湯嘅精華,入口軟腍冇根;而燒過嘅雞肉串肉嫩多汁,配埋彈牙嘅炸豆腐魚丸就試勻唔同口感喇。

大阪燒串燒(HKD28)比平時食嘅大阪燒方便,一串串咁食有啲似魚餅。而可樂餅(HKD28)有紫薯、蕃薯同咖喱3款唔同口味,食落外脆內軟㗎。

 

俺流亭
地址:將軍澳常寧路厚德邨TKO Gateway東翼一樓E139號舖
電話:2338 1251
營業時間:星期一至日:11:30-21:00

You may also like...

Leave a Reply

Your email address will not be published. Required fields are marked *