【週末2人日式下午茶 靜岡蜜瓜甜點×極上壽司】帝都酒店櫻田日本餐廳

週末放鬆吓，不如歎個Tea啦！主打和食嘅帝都酒店櫻田日本餐廳推出咗靜岡蜜瓜日式下午茶(HKD448/2位)，以甜點配極上壽司，仲附送2杯手調製作嘅蒸餾咖啡或柚子茶，人均二百幾蚊就食到，想解思鄉情就book位試吓啦！

呢個鹹甜點Tea Set有4款靜岡蜜瓜甜食、4款精選極上壽司同兩款小食，下午茶嚟講分量都算多。喺日式風格嘅環境下，慢慢歎個下午茶就更有風味。

先試原汁原味嘅靜岡蜜瓜果肉，香甜又多汁。靜岡蜜瓜果撻有香酥牛油曲奇皮配香濃幼滑嘅吉士醬、面層嘅靜岡蜜瓜粒令口感層次更豐富。

靜岡蜜瓜奶凍食落軟滑微甜，配搭面層嘅蜜瓜球就更清甜喇。而靜岡蜜瓜銅鑼燒因為有埋北海道十勝紅豆，味道比較甜少少；加上內餡有埋蜜瓜肉，食落更有口感。

鹹食方面，火炙和牛海膽壽司由7成熟嘅焦香和牛配鮮甜海膽，令整體味道鹹香之中帶點甘甜。金箔軟殼蟹卷有牛油果同蛋黃醬加埋一齊，好滋味呀！

火炙吞拿魚腩壽司油脂分布均勻，鍾意食刺身的話可以試吓未經炙燒嘅食法，會更加肥美同入口即融！

火炙帆立貝漢堡壽司有別於常見嘅壽司，用大大粒肉質飽滿嘅帆立貝包住壽司飯，咁嘅食法真係好滿足呀！

仲有兩款日食小食㗎！半熟嘅黑松露玉子卷好嫰滑，黑松露味非常濃郁。而汁煮翡翠螺俾甜甜哋嘅醬汁醃得好入味，比想像中更滋味喎。

下午茶附送兩杯即製手調飲品，蒸餾咖啡香味濃郁，而柚子茶微甜唔苦澀，兩款配鹹甜點都好夾。

靜岡蜜瓜日式下午茶
供應日期：即日至11月31日逢星期六、日及公眾假期
供應時間：15:00-16:00
推廣價：HKD448/兩位用(另加一服務費)

帝都酒店櫻田日本餐廳
地址： 沙田白鶴汀街8號帝都酒店3樓
電話： 2694 3810
營業時間：星期一至日：12：00-22：00