【Glasshouse旗艦店設天台花園 全新歐亞餐飲重磅登場】Glasshouse Greenery

Glasshouse Greenery全新旗艦店喺尖沙咀K11 MUSEA開業喇!今次以「森林」為題,室內外都感受到大自然嘅氣氛。食物有東南亞、日式、西式等口味選擇,加上分量十足,無論自己定同朋友開心share都夠飽。

餐廳唔同角落都有大大細細嘅盆栽,天然採光令感覺更加寫意,黃昏時間喺天台花園嚟個Happy Hour都唔錯㗎。

今次絕大部分餐飲都係新設計,呢款吞拿魚牛油果藜麥沙律(HKD158)就俾大家refresh味蕾。以黑、紅、白三色藜麥置底,配埋黃鰭吞拿魚刺身、新鮮牛油果粒、青蘋果粒、車厘茄同蘿蔔絲,撈勻橘子醬汁嚟食,集合甜酸又鮮味嘅清新味道。

小食拼盤(HKD198)就啱晒有選擇困難嘅朋友,有招牌單骨蜜糖雞翼、素春卷、炸蝦餅、炸魷魚鬚、沙嗲牛肉同雞肉串燒,每款都好惹味亦唔覺得油膩。配埋自製沙嗲醬同泰式辣醬,大大提升滋味感覺,仲有新鮮青瓜條俾你清一清喉嚨,都幾細心喎。

和牛漢堡配黑松露蛋黃醬(HKD158)採用澳洲上等牛肉自家製成鬆軟漢堡扒,而且加入Mozzarella芝士以橄欖汁先煎後焗,咬落肉汁豐富;加埋松露蛋黃醬、磨菇、經白醋自家醃製嘅紫洋蔥、新鮮蕃茄、煙肉同羅馬生菜等配料,女仔食晒一個已經好飽喇。加埋脆口炸薯條,真係未必食得晒。

要有米氣嘅話,和牛叉燒鵝肝煎蛋飯(HKD188)就夠晒豐富喇。澳洲和牛以低溫慢煮大約45分鐘,再掃上叉燒醬烤至七到八成熟,食落依然有和牛嘅油香,唔蘸醬就更原汁原味。香煎脆嫩鵝肝連埋荷包蛋一齊食,香滑綿密嘅口感就更出色喇。

四季薄餅(HKD158)嘅薄餅餅底係自家製,一個pizza包含四種口味嚟代表四季。春天鋪上蕃茄水牛芝士同金不換葉絲;掃上蕃茄醬配新鮮牛油果就代表夏天;而有多款雜菌、松露醬同火箭菜就係秋天;最後以Mozzarella芝士、Buffalo Mozzarella芝士、巴馬臣芝士、藍芝士同Fontina軟芝士五款香濃芝士代表冬天。成個pizza有12-13″,啱晒一家人share食。

脆皮梳乎厘(HKD128)非常巨型,有雲呢拿、綠茶同朱古力三款口味俾你揀,表面好似菠蘿包嘅脆皮添。呢個綠茶味食落空氣感十足, 都食到蛋香,如果落埋雲呢拿醬就會甜膩啲。

香芒印度煎餅(HKD78)有咁多煉奶以為會好甜,但香脆鬆軟嘅牛油煎餅配埋新鮮芒果粒同薄荷葉反而有juicy同清新嘅感覺喎。

如果掛住佢哋人氣嘅香蕉火焰焦糖燉蛋(HKD88),呢度都可以食到。喺焦糖燉蛋表面鋪滿新鮮香蕉切片,上枱後店只員會倒入冧酒同意大利特濃咖啡,再用火槍輕燒。滑嘟嘟嘅口感又唔會好甜,絕對有令人獨食嘅衝動。

藍日落(HKD58)混合香茅、菠蘿汁、青檸汁同蝶豆花茶,有種泰式飲。

想飲Cocktails的話,玫瑰小姐(HKD128)混合龍舌蘭酒、玫瑰糖漿、蜂蜜、檸檬汁、玫瑰酒、Moscato 甜氣泡酒同自家製士多啤梨冰塊,酒味幾濃郁。而秘密花園(HKD148)混合帶有蜂蜜魚子醬、注入接骨木花利口酒嘅青瓜粒、少有嘅迷迭香爆珠同Prosecco氣泡酒,啱晒鍾意清爽嘅朋友呀!

 

Glasshouse Greenery
地址:尖沙咀梳士巴利道18號K11 MUSEA 5樓501號舖
電話:2338 1251
營業時間:星期一至日:11:30-23:00 (休店時間按政府政策調整)

You may also like...

Leave a Reply

Your email address will not be published. Required fields are marked *