【荃灣新開人氣「大排檔」旗艦店 歎脆皮芝士龍蝦+懷舊菜】楚撚記大排檔

喺土瓜灣幾受歡迎嘅楚撚記大排檔去到荃灣開第3分店,亦係旗艦店呀!同以往一樣,新店會有限定菜式推出,今次就多咗啲古法菜式,即刻睇吓小編嘅心水推介啦!

旗艦店以懷舊嘅嘅綠、白地磚帶出舊式裝潢嘅感覺。而為咗疫情嘅清潔問題,餐廳暫時用即棄餐具。

脆皮芝士焗原隻新鮮龍蝦(HKD238/優惠價HKD168)每日限量供應,大約半斤重嘅龍蝦啖啖肉又多膏,面頭嘅脆皮下有少少薯蓉同芝士嘅鹹香,反而令龍蝦嘅鮮味更突出。

想延續脆口嘅感覺,跟住就要試一口脆炸雙重芝士波波(HKD68)。用瑞士Gruyere 芝士加上意大利00粉調配出嘅鹹香味唔會濃到食一啖就膩,加上入面似薯蓉嘅軟綿質感,同香脆外皮做成反差嘅感覺幾特別。

古法生扣蝦籽柚皮(HKD138)係傳統經典粵菜,工序繁複到好少酒樓願意整。經過燒、浸、洗等工序逼出柚皮嘅苦澀味,再用鮮味鮑汁煨煮到入口即融嘅軟腍度,最後灑埋蝦籽提味就食得。想試呢道古法菜式就一定要嚟試喇,佢哋仲有香濃南乳粗齋煲(HKD72)蟲草花臘腸雲耳蒸滑雞(HKD86)都幾夾呢度菜㗎。

去得「大排檔」,好多人都會點鑊仔小菜。秘製辣酒煮花螺(HKD125)一上枱就傳出陣陣香氣,用小蠟燭㷫住保溫可以暖暖哋咁食。除咗花椒、麻辣嘅氣味,仲有香葉令色香味加分添。花螺入味又嫩滑爽口,仲有嗦晒汁又多汁嘅白蘿蔔條中和返熱氣嘅感覺,成個配搭好細心。

呢度仲有唔少招牌菜,其中激椒避風塘水魷(HKD89)係嗜辣嘅朋友必點菜式,連餐牌都mark咗3隻辣椒㗎!開頭食落覺得係中等辣度,但連埋嗦晒汁嘅粉絲同芽菜一齊食,後起嘅辣勁就令小編即刻飲水!成個菜式都好爽口,係愈食愈上癮嘅滋味。

人氣度極過嘅西楚霸王雞(HKD128/半隻,HKD256/隻),全隻的話都幾重秤,夠4-5人食。大量蔥同炸蒜做配料令味道同口感層次更豐富同鮮香,食落肉質嫩滑有雞汁,最好嘅係唔多脂肪,食多幾件都okay。

平時少湯水滋潤的話,一定要飲個足料老火湯潤返吓。今日供應嘅老火菜乾煲豬肺湯(HKD95/細)都分到4大碗,睇湯渣都有唔少雞腳、豬肺同菜乾,飲落香甜味濃令人想一飲再飲。另外仲有西洋菜羅漢果南北杏陳腎豬骨湯(HKD95/細)花旗蔘淮山煲竹絲雞排骨湯(HKD110)猴頭菇蟲草花准山螺頭煲豬骨湯(HKD95)等湯水輪流推出㗎。

 

楚撚記大排檔
地址:荃灣川龍街118號百悅坊地下及1樓
電話:3997 3661/5338 1859(WhatsApp)
營業時間:星期一至日:17:30-03:00 (休店時間按政府政策調整)

You may also like...

Leave a Reply

Your email address will not be published. Required fields are marked *