【日式料理新店3大主打 壽司×蕎麥麵×日本酒】SUSOSHU

高質嘅日式餐廳都有自己獨特嘅賣點,而尖沙咀新店SUSOSHU就以「壽司 Sushi」、「蕎麥麵 Soba」同「日本酒Nihonshu」三大元素做主打。呢度有正宗日本地道手法嘅午餐同晚餐,無論係料理款式定係壽司款式,都會用上日本多個地方直送嘅新鮮食材,務求令你有置身日本嘅感覺。依家新張期間,午餐第二位仲有7折優惠添。

餐廳座位唔多,大約容納20人左右,一半可以坐到壽司吧台,睇到師傅炮製各式料理,享受高級嘅體驗。

因為疫情關係,依家加開午市時段俾大家lunch都可以食好啲。午市4款套餐以和牛、壽司同蕎麥麵做主打,每款都會跟呢3款前菜同甜品,其中大大件嘅壽司卷就有炸蝦天婦羅、玉子、蟹柳、蟹籽等8款食材,未食住菜都覺得豐富呀!

呢款A4和牛伴冷柚子和牛清湯蕎麥麵套餐(HKD398)將鹿兒島A4和牛輕輕燒製,令你食到軟滑juicy嘅質感,同時有微微火燒嘅味道。每食一塊肉片,配上以冷柚子同青檸調味嘅湯底入口好清爽開胃,中和和牛嘅油膩感。

壽司蕎麥麵套餐(HKD368)就啱晒鍾意多款式嘅香港人!套餐有齊「江戶之三味」,5件壽司同2款刺身都係時令款式,味道由淡至濃,由淺色開始食到深色。

小編當日嘅秋刀魚刺身好新鮮爽口,而土佐蟹肉壽司以啫喱蓋面亦幾特別㗎,當然仲有大家鍾意嘅肥美拖羅壽司、帶子刺身壽司等款式。

另外配埋天婦羅盛合,同埋可以自己調味嘅蕎麥麵,精緻得嚟都好飽肚㗎。

呢度嘅晚市套餐(HKD1,280/位)可以試到唔同嘅時令刺身、壽司同料理菜式,亦會按時季轉換款式或變成單點菜式。呢兩款前菜就有鹹香脆口嘅紫菜櫻花蝦卷(上);而食用花點綴嘅蟹肉甘蝦配土佐啫喱(下)入面有蟹肉同甘蝦粒,鮮甜味同口感層次都好豐富㗎。

話明壽司係呢度嘅主打之一,晚市當然要食返幾件先話癮啦!當日嘅時令壽司有疊幾層嘅北海道海膽壽司,色澤金黃又juicy;北海道秋刀魚好爽口,打破平時對帶皮魚嘅感覺;仲有厚切嘅長崎拖羅入口即融,每件都俾你大大嘅滿足感!

日本菜之中,和牛可以話係熱門菜式,呢道煙燻和牛將熊本和王A4和牛原塊經過煎煮、蒸焗、再以蘋果木煙燻約2分鐘,入口散發滿滿煙燻同和牛香味。而且廚師好有心思將煙燻和牛變成三種食法,以有機水耕菜配成和牛沙律;淋上以牛骨熬咗10個鐘嘅傳統西餐燒汁;仲有可以配新鮮芥末嘅原味食法,無論清新定濃厚口味都一次試勻。

甜品亦配合「日本酒」主題,星空寒天甜品加入兩款濃淡口味嘅日本清酒,形成「冬天與海洋」嘅夢幻效果,入口仲有變幻嘅酒香同檸檬味添,不過食之前記得打卡呀!

 

SUSOSHU
地址:尖沙嘴亞士厘道17-19號1樓
電話:2633 3882
營業時間:星期一至日:12:00-15:00,18:00-21:00(最後點餐時間:19:30)

You may also like...

Leave a Reply

Your email address will not be published. Required fields are marked *