【名廚主理西瓜Fusion菜 招牌M5牛肩肉×海鮮拼盤】Oasis Bar & Grill

諾士佛臺新開咗間由名廚主理嘅西瓜Fusion菜Oasis Bar & Grill,完全顛覆視覺同味覺體驗呀!主打嘅西瓜三文治、西瓜牛扒超有新意。餐廳仲提供多款賣相好靚嘅特製雞尾酒添,打卡一流㗎,即刻睇吓有咩食啦!

店內嘅環境以黑白色做主題,裝修精緻;仲有單、雙人座打卡藤椅位添,同朋友屋企人去食飯影相就啱晒喇。

先介紹呢度必試嘅西瓜主題菜式啦!西班牙燒豬腩伴西瓜三文治(HKD108)以烤過嘅西瓜同燒豬腩片層層相間,豬腩片鹹香有咬口,西瓜嘅清甜中和咗豬腩肉嘅油膩感。

炭烤西瓜牛扒伴香草燒新薯,時令蔬菜(HKD168)無論外表定香味都似一份真嘅牛扒。烤熱西瓜質感軟糯,入口鹹中帶甜有肉香,層次感豐富。

西瓜雪葩(HKD78)以奇異果、柚子同西瓜雪葩製成西瓜顏色嘅甜品,味道清新鮮甜,做飯後甜品就啱晒喇。

試埋餐廳嘅幾款招牌菜先,鍾意食海鮮一定要試吓海鮮生蠔拼盤(HKD398)!集合法國即開生蠔、青口、阿根廷紅蝦同北海道帶子,仲有4種醬汁配搭肥美新鮮嘅海鮮添。

炭烤澳洲M5和牛肩肉(HKD398)牛肩肉肉質軟嫩夠juicy,微微嘅炭香令滋味度加分添。配菜之中法式忌廉焗薯都好有驚喜,千層薯泥香濃有層次,亦有保留少少咬口。

啱晒素食者嘅Im not Lasagna(HKD98)以茄子加意大利青瓜代替牛肉醬,營造出同樣香濃滋味。

至於賣相靚靚嘅打卡飲品就有招牌雞尾酒The Oasis(HKD148/右)Mrs(HKD148/左)同埋無酒精Mocktail LIPS OF AN ANGEL(HKD88/中),3款都易入口㗎。

 

Oasis Bar & Grill
地址:尖沙咀諾士佛臺1號8樓

電話:2887 9820
營業時間:星期日至四:17:00-01:00,星期五、六:17:00-02:00

You may also like...

Leave a Reply

Your email address will not be published. Required fields are marked *