【假日潮歎山頂新餐廳 當地食材炮製傳統意菜】FIAMMA

喺山頂就一定食貴嘢?非也!新開嘅意大利餐廳FIAMMA雖然8至9成材料用返當地食材,但價位就同銅鑼灣、中環差唔多。呢度主打傳統意大利家庭式嘅精製烹飪技術,再融入意籍米芝蓮星級廚師Enrico Bartolini嘅烹飪藝術,以後上山頂玩都有好嘢食啦。如果周末早上嚟嘅朋友,10:30am前可以試埋佢哋嘅輕食早餐添,都係幾十蚊份咋!

店內外嘅環起都好闊落,有情調得嚟又俾人放鬆嘅感覺。

經典開胃菜之中不得不提呢款烤西班牙八爪魚配香辣蕃茄醬(HKD148),將西班牙盛產嘅八爪魚足鬚快煮後,加入由蒜頭、蕃茄、紅椒同橄欖油煮成嘅意大利香辣茄醬“arrabbiata”,連同蒜油簡單調味,令爽口軟滑嘅八爪魚鬚味道更加鮮甜有層次。雖然佢放耐咗都唔會變硬,但都建議你趁熱食品嚐埋烤過嘅火炙香味。

意大利皮埃蒙特牛肉他他(HKD188)睇得又食得!皮埃蒙特牛肉質感細嫩帶香濃肉味,亦較少脂肪㗎。他他以橄欖油同鹽簡單調味,食嘅時候撈勻新鮮黑松露、芝士同鵪鶉蛋黃,入口會有種清香中帶微鹹嘅滋味。

鍾意食海鮮嘅朋友有兩款主食推介俾你,首先係海膽烏魚子意粉(HKD298)。意大利當地唔少菜式都會加入烏魚子,所以佢唔係亞洲菜專利嚟㗎。新鮮自家製意粉配上Greymullet同Sicilian Tuna兩款烏魚子,加埋日本海膽提升鹹鮮味特別醒神。

另一款梗係龍蝦湯海鮮燴飯(HKD228)啦!用珍貴嘅意大利米Acquerello加入魷魚、青口、西西里紅蝦、香煎大帶子,以龍蝦濃湯、海蘆筍同檸檬煮成,味道香濃得嚟幾fresh同開胃,而且每啖都好有咬口添!

食肉獸必試米蘭經典菜意式米蘭炸小牛肉(HKD348)500g小牛肉以鹽、胡椒同雞蛋蛋漿醃製小牛肉,面頭嘅麵包糠炸到金黃酥脆,但食落依然軟腍有肉汁,而且肉味都幾突出。伴有新鮮沙律同百里香蛋黃醬,想解膩或再惹味啲都可以自己調節。

想食傳統意式pizza?就佢哋即叫即焗嘅辣豬肉腸蕃茄水牛芝士薄餅(HKD208)啦!主廚堅持用意大利"00"號小麥薄餅麵粉,加入酵母、鹽、糖等用料自製麵糰;而且緩慢發酵24小時令薄餅薄得嚟帶啲煙韌嘅感覺。蕃茄醬配上微辣豬肉腸、意大利牛乳芝士Fior Di Latte Mozzarella同新鮮水牛芝士,鹹、辣、酸、甜嘅味道都融合得好好呀!

甜品控試埋呢兩款意式甜品!意式奶凍配野莓醬(HKD88)用淡忌廉、牛奶、糖、天然魚膠整成,一入口就有奶香嘅味道,仲好似豆腐花咁滑添!加埋野莓醬同士多啤梨一齊食就更加清新。

TIRAMISÙ(HKD88)用鮮忌廉加入檸檬酸整成,面層入口creamy有空氣感;潷到底連埋意大利手指餅乾一齊食的話,就更加感受到有郁果香嘅Arabica特濃咖啡味道喇,而且食晒都唔覺得有油膩感。

餐廳亦有多款Cocktails同Mocktails,右邊嘅Apricot Smash(HKD118)以杏桃、倫敦乾氈酒、杏仁、青檸同薄荷調配,口味幾清爽。左邊嘅Mali-Cruise(HKD78)就以椰子、菠蘿同蔓越莓整成,椰子香氣突出仲好fresh添。

 

FIAMMA
地址:山頂山頂道118號山頂廣場地下G02號舖
電話:2657 0800
營業時間:星期一至五:11:00-22:00,星期六、日;08:30-22:30

You may also like...

Leave a Reply

Your email address will not be published. Required fields are marked *