【九龍城重量級泰式燒烤 觀塘開店設戶外雅座】榕易燒泰式串燒專門店

喺九龍城好出名嘅榕易燒泰式串燒專門店喺觀塘開店喇,依家有埋戶外座位,氣氛夠晒chill呀!除咗招牌串燒之外,仲多咗古法燒鰂魚、炸蠔蛋餅呢啲香口又鮮味嘅菜式。無論係兩小口定三五知己嚟食嘢,都有滿足到你分量嘅菜式,如果係附近返工,佢都有抵食lunch menu喎!

除咗少量室內座位,仲有大大個戶外空間俾你坐低慢慢食,每限枱都好闊落㗎。

平時打冷有蠔餅食,呢度都有泰式煎蠔蛋餅(HKD98)喎。唔止直徑size大個塊面,仲有返咁上下厚度,香脆口感仲啖啖都有juicy嘅蠔肉,蘸埋自家調配嘅泰式辣汁就更惹味喇。不過唔食得辣嘅朋友蘸少少先好喇,後勁都唔弱㗎。

另一道啱晒三五知己share嘅就係海鮮古法燒鰂魚(HKD128)喇!魚肚釀咗唔少泰式香料,加上鹽燒方法令味道滲入魚肉,但又唔會蓋過本身嘅鮮味。剪開魚皮就有嫩滑嘅魚肉,想濃味啲就點埋泰式辣汁啦!

燒北海道魷魚筒(HKD128)用上日本愛知縣嘅大魷魚,燒完後掃上醬料已經夠晒味,魷魚身滑嫩彈牙,而魷魚鬚就幾爽口,並冇燒到乾晒,火喉掌握得好好喎。

呢度仲有唔少串燒都深受歡迎,左至右分別有燒新鮮雞心(HKD28)燒新鮮雞肝(HKD28)燒安格斯牛仔骨(HKD42)日式一口和牛(HKD48)燒黑毛豬肋條(HKD48)同埋鹽燒厚切牛舌(HKD48)。唔止選料用心,連煮都落足心機㗎,好似厚切牛舌先用高湯慢煮2個鐘再燒,令口感少有咁軟熟,一啲都唔韌,係必食嘅串燒款式之一!

餐廳用名分量足,連燒原條蒜蓉茄子(HKD34)都比平時嘅大條厚用啲。加上面頭灑上大量香蒜同調味料,真係極度惹味。

泰式生蝦食得多,泰式生蠔杯(HKD32/隻)你又食過未呢?佢哋好悉心俾你單隻嗌,咁點一隻試咗先就唔怕啦。不過大廚過通常客人試咗一隻就即刻叫半打,睇嚟肥美嘅蠔肉配泰式醬料都夾到香港人口味喎。

佢哋最近開埋午市,俾觀塘區上班族有多一個選擇。泰式牛肉船河(HKD46)係其中最受歡迎嘅選擇,湯底除咗用骨湯熬煮,仲加咗少少藥材可以壯腰補腎添;同時仲有辣椒粉、青檸等調味,如果唔食得辣可以落單時講明走辣,服務都幾細心。配埋牛肉、牛丸、炸豬皮都幾大碗,不過泰式河粉唔易發脹,食晒都冇咩頂胃嘅感覺。

鍾意咖喱嘅朋友就要試馬沙文咖喱炆牛腩飯(HKD58)喇!咖喱汁帶椰香,辣度會慢慢滲出嚟,不過唔會好辣,撈飯一流!而且大大嚿嘅牛腩同薯仔都煮到軟腍入味,呢款真係飯桶嘅首選囉!

 

榕易燒泰式串燒專門店
地址:觀塘巧明街117號港貿中心2樓201號舖
電話:9627 2035
營業時間:星期一至日:12:00-15:00,18:00-00:00,星期日;18:00-00:00

You may also like...

Leave a Reply

Your email address will not be published. Required fields are marked *