【一舖兩店歎中越滋味菜 滋味羊腩煲×越式火鍋】Số Tám、嚐‧捌

時代廣場對面嘅英皇珠寶中心2樓，分別開咗兩間中越菜館，而且同樣有熱辣辣嘅鍋物同大家一齊迎接冬天，仲有香港少見嘅越式火鍋添，即刻睇吓有咩正嘢啦！

Số Tám

上到嚟就見到大大幅越車街頭景象嘅打卡牆，未去到旅行就影相扮去咗先啦。

越南菜本身比較濃味，亦較常用魚露，所以呢個越南豪華火鍋(HKD248)蟹湯都比較偏鹹，想滋潤啲亦有椰子雞湯可以揀。火鍋本身已經包含蜆、魷魚、牛肉同菜，如果想追加食物，咁就要試當地食材濱海(HKD28)喇，質感似米粉，仲好嗦湯添。

鮮茄牛腩煲配法包(HKD188)蕃茄味濃郁，潷埋入晒味嘅牛腩落法包就鹹度啱啱好喇。而且法包唔係俾幾片薄片咁少，絕對夠share食。

想有飯氣落肚可以試燒原條魷魚釀黃薑碎米飯(HKD138)，雖然睇落濃味，不過淡淡嘅黃薑香氣反而令成道菜清新咗。而爽口嘅魷魚配上炸蒜粒就更有口感添。

呢度亦有午市套餐，春卷雞肉串燒撈檬(HKD88)就有近兩個麵底，配埋越菜必備嘅春卷同雞肉串燒都好受歡迎。午餐仲可以升級豪華套餐(+HKD20)會有埋特式飲品、精美小食、開胃沙律同甜點添。

Số Tám
地址：銅鑼灣羅素街 8號英皇珠寶中心2樓
電話：2323 1299
營業時間：星期一至日：11:30-22:30

嚐‧捌

越菜隔離就係中菜喇，呢度主打新派點心，同時都有傳統小菜。

冬天又點少得滋味羊腩煲(HKD168)呢？！羊肉煮得入味彈牙，分量都唔少㗎。仲有馬蹄、枝竹、生菜，會唔會令你想獨食呢？

花雕醉雞雲吞煲(HKD128)有原隻大雞髀，肉質滑嫩，仲配有4大隻脹爆雲吞同小唐菜添；潷埋湯邊飲邊食就最原汁原味喇。

想試廚師功力就點蛋白炒鳳尾蝦(HKD68)啦！滑溜嘅蛋白微微帶片狀，加上鳳尾蝦嘅爽口同鮮味，整體味道好似幫你refresh味蕾咁清新。

想點前菜的話不妨試吓雞油松草、梅酒秋葵(各HKD28)兩款涼伴，前者有木耳絲、蘿蔔絲等素菜好爽口，後者用料就配合依家嘅健康潮流。

仲有饅頭肝醬(HKD62)都幾特別，饅頭開邊炸好配上黑胡椒豬肝醬同鹹香嘅洋蔥，係中式嘅鵝肝醬配餅乾組合，而且同樣有入口即融嘅質感喎。

XO帶子餃(HKD18)外表平凡，但充滿內餡！入面包住鮮帶子、越南海蝦肉、馬蹄、芫茜同粉絲，將粉絲蒸帶子變成點心，食落爽口仲好鮮甜㗎。

唔講你可能睇唔出香芒吉士炸包(HKD23)係甜品，心形炸饅頭夾住香甜嘅芒果粒同微甜嘅吉士醬，咬落有齊脆口、creamy同果肉爆汁嘅感覺。

嚐‧捌
地址：銅鑼灣羅素街 8號英皇珠寶中心2樓
電話：2323 1288
營業時間：星期一至日：11:30-22:30