【健康主意打卡Café 波希米亞風登入蘭桂坊】角落

去唔到旅行,去間有異國風嘅餐廳都好吖。喺蘭桂芳唔一定要飲酒,去有波希米亞裝備嘅角落飲杯咖啡,歎個輕食都可以好chill,而且食物主張以食材原味提鮮,盡量少油鹽都一樣做到香濃嘅菜式。

餐廳有唔少打卡位,仲可以坐吊椅影張靚相添。

慢煮雞胸羽衣甘藍青醬意粉(HKD108)嘅青醬係本地製造不含味精,同意粉一齊炒香就鋪上大大份慢煮雞胸肉。配埋焗到香脆,好似薯片咁嘅羽衣甘藍,口感豐富又hearvy。

帶意式風味嘅自家蕃茄乾醬烤大蝦意粉(HKD138)酸甜開胃,配上爽口烤大蝦就更加鮮甜。

想食素得嚟又有肉嘅感覺,可以試吓用咗新豬肉嘅蕃茄素肉醬長通粉(HKD98),同素肉碎同蕃茄、芝士一齊煮,食落同真肉一樣咁有咬口。

素版All Day Breakfast(HKD138)聽落冇咩特別,但用料其實好豐富。素雞塊、炸薯餅、牛油果多士等等都係飽肚嘅食材,配埋大菇、腰果同蔬菜都幾飽肚。

鍾意牛油果嘅朋友一定要試烤蘑菇牛油果蓉多士(HKD118)!喺黑麥多士搽上用一個牛油果、洋蔥等材才新鮮打成嘅牛油果醬,加上大量烤蘑菇係完美嘅配搭。仲有油封串茄同意式沙律做配菜,成個感覺都超健康呀!

如果要完完全全嘅蔬菜,但又唔想都係生食撈醬咁悶,烤菜沙律碗(HKD78)就幫到你喇。珍珠荀、紅菜頭、椰菜仔、南瓜、串茄全部都烤過,仲有少少「火」嘅味道,配埋意式沙律菜喺冬天都食到啦。

想就咁食件cake可以試吓Cream Brûlée Cheesecake (HKD48),店員會即時喺蛋糕面加上黃糖再火灸。微脆同香甜軟滑嘅口感都一次過食到!

 

角落咖啡廳
地址:中環德己立街23號晉逸蘭桂坊精品酒店2樓

電話:2382 4899
營業時間:星期一至日:12:00-21:00

You may also like...

Leave a Reply

Your email address will not be published. Required fields are marked *