【佐敦新穎泰菜酸辣惹味 黃金入球×生蝦兩食】泰泰

唔知你印象中嘅泰菜係點,但佐敦嘅泰泰有Quincy嘅加入就多咗啲新花款喎。負責人之一嘅Sunny話:「我同Quincy之間可以互補,我哋對食物質素有要求,而佢嘅擺盤我成日都話靚㗎添。」

餐廳裝潢充滿泰式嘅感覺,令你好似置身當地咁呀!呢間房仲特別間咗個「露台」,成個感覺又更加開揚。

平時食生蝦刺身唔會有特別期待,但Sunny佢哋每日都親自去供應商度,睇實潷起嘅每隻都係活蝦先收貨。因為呢道泰式生蝦刺身(HKD132)會將蝦頭生炸到脆卜卜,腸見咁靚嘅橙色蝦頭就知新鮮啦!而蝦身配上泰式青醬,好鮮辣爽口㗎。

黃金入球(HKD143)就由傳統嘅蝦膠釀皮蛋演變出嚟,將新鮮墨魚滑打成膠釀入新鮮鹹蛋黃再炸至金黃色,食落外脆內彈,而且冇咩油膩感,想食記得提早預訂喎。

清邁酸辣飛天羅飛魚(HKD240)大約有斤半左重,夠4個人食。而且起晒骨再片肉炸到酥脆香口。再淋上酸辣嘅沙律汁,味道有啲似加辣版嘅泰式木瓜沙律,有別於平時食炸魚嘅油膩口感,如果帶小朋友嚟食仲會細心將醬汁分開上添。

選用中級美國牛小排取代西冷嘅泰式青檸燒牛肉(HKD98)起咗筋,入口肉味濃郁又軟腍,邊掃燒烤汁邊燒令肉本身好夠味,亦喺酸鹹嘅味道之中帶少少甜味。加埋灼芥蘭解膩,食多幾件都唔怕。

呢度仲有午市套餐(HKD68起),其中無骨海南雞飯跟湯(HKD78)都配咗自家製海南雞醬,用魚露打成好似豉油薑蓉嘅感覺,鹹鹹哋幾惹味。而嫩滑嘅粟米雞濃味冇咁多油,食埋雞皮都唔會好肥。

食咁多濃味菜式,飲返個原隻椰青沙冰(HKD55)都唔錯㗎。以椰青水打成沙冰,撈埋椰肉好清甜,不過Quincy就大呻:「呢個好多功夫㗎,出4個椰青嘅速度先整到一個青沙冰!」

Quincy嘅心思連喺原隻芒果糯米飯(HKD43/細)都可以感受到,如果重要紀念日嚟食,仲可以免費切成花形再加個朱古力牌添。

 

泰泰 Thai Thai Restaurant
地址:佐敦吳松街182號榮國中心地下B-D號舖
電話:2779 8989 
營業時間:星期一至日:12:00-23:00

You may also like...

Leave a Reply

Your email address will not be published. Required fields are marked *