【$228歎4道泰法Fusion菜 爆汁牛角包+咖喱和牛面頰】享慢煮泰 Lemon Grass By Fast Gourmet

想享受高質素高CP值嘅泰菜可以試吓喺堅尼地城嘅享慢煮泰,融合慢煮同泰式料理創作fusion菜。餐單中自選2-4道菜(HKD148-228),包括必試嘅自家製名物冬蔭龍蝦湯或法式龍蝦湯流心牛角包、前菜、慢煮料理同甜品。每道菜式都落足心思製作,款款都咁正呀!

必食自家製流心牛角包分別有法式龍蝦湯同冬蔭龍蝦湯2款味,係喺傳統牛角包內加入秘製湯汁。切開金黃酥脆嘅牛角包,熱辣辣嘅湯汁就會流晒出嚟。兩款湯汁都好濃郁,至於邊款好食,就睇吓你鍾意傳統法式龍蝦湯定係新穎惹味啲嘅冬蔭龍蝦湯喇。

龍蝦鳳梨沙律有齊菠蘿、沙律菜同龍蝦肉,龍蝦肉混合咗明太子醬令味道更鮮甜。酸甜開胃,做前菜啱啱好呀!

即叫即燒嘅燒美國生蠔配泰式辣汁燒到半熟保留海水味,肥美嘅蠔肉配上酸甜微辣泰汁好清新。

主菜之一嘅冬蔭龍蝦汁燴海鮮以多款香料同海鮮製作,冬蔭公味香濃微辣,湯中有蝦、青口同蜆等多款海鮮,新鮮之餘分量都幾多㗎!

另一款瑪莎曼咖喱和牛面頰經過真空慢煮16個鐘以上,鎖緊和牛面頰肉汁同骨膠原,令肉質嫩滑軟腍。和牛面頰肉掛汁入味,而瑪莎曼咖喱味道微甜,帶濃郁椰香同花生香,兩款主菜都好適合撈飯食!

甜品真空慢煮法式焦糖燉蛋比一般燉蛋更香滑,底部加咗鳳梨醬令整體更有層次,甜度適中唔膩。

椰子雪糕配風乾鳳梨及紫糯米特別選用混合椰絲嘅椰子味意大利雪糕,口感香滑濃郁;下層仲有椰子肉、紫糯米同鳳梨乾,一啖食到多重香味。

飲品方面,小編分別試咗似椰子沙冰嘅Thai Pearl Cocktail(左)、芝士奶蓋配咖啡嘅Tiramisu Cheesy(右)同埋mix咗橙、活性炭同奶泡嘅Storm Rider(下),3款都好特別又唔甜膩!

 

享慢煮泰Lemon Grass By Fast Gourmet
地址: 西環堅尼地城卑路乍街150號加多近山地下A號舖
電話: 6887 8147
營業時間:星期一至日:11:30-21:30

You may also like...

Leave a Reply

Your email address will not be published. Required fields are marked *