【Lady Nara粉色登場 香茅燒雞×鹹脆香甜小食】Lady Nara

今次介紹嘅過江龍係來自曼谷嘅Lady Nara,喺尖沙咀海港城海邊位置,所以餐廳窗邊嘅4人枱大部分都望到海㗎。香港店秉承總店風格,將泰國元素融入特色歐陸菜之中,為食客呈現富新鮮感嘅美食!

店內打卡位幾多吓,呢張吊椅更加係必影「景點」。

坐唔到窗邊海景位置都唔緊要,卡位都一樣舒服,仲幾高私隱度添。

VIP房有自然火透入添。

香港店都有精選總店鎮店菜式,其中芝士肉醬粟米片(HKD98)嘅墨西哥粟米片本身已經鹹脆有咬口,而芝士泰式打拋豬肉醬唔會好濃味,加埋一齊都唔覺膩,反而想追住食喎!另外,仲有菠蘿莎莎醬、加入紅菜頭汁嘅東北辣椒醬同牛油果醬俾你蘸,一份小食已經有多款味道組合喇!

肉食愛好者可以試特式脆雞拼盤(HKD128),有淡香嘅松露脆雞翼、黃金爆谷雞同甜酸嘅燒烤雞搥。呢款同樣配有自家調配嘅東北辣椒醬俾你配松露脆雞翼,微辣有多份色水,打卡就更吸引啦。

冬蔭忌廉煙肉意粉(HKD118)係輕食啲嘅意炒。冬蔭味比較低調,所以味道唔會好沖擊,撈埋蛋汁令口感更香滑。

香港店限定菜式之中,香茅燒雞(HKD198/半隻,HKD328/原隻)係必食之選。黃油雞唔會好肥,先用魚露、青檸汁、香茅等 18款香料醃過夜,再釀入新鮮香茅以 180度烤焗半小時,皮香肉嫩好入味。如果想惹味啲,跟配嘅泰式辣汁絕對可以滿足你,不過怕辣嘅朋友最好蘸少少試味先,食完都想即刻飲嘢解辣㗎。

甜品控必食呢款泰式奶茶意大利芝士餅(HKD88),無論打卡定味道都係一流呀!自家調配過嘅牛奶會分上俾你,淋落Tiramisu就會有瀑布效果!嗦咗泰式奶茶嘅餅底唔會好甜,入口鬆軟有啲空氣感。

玫瑰奶茶流心蛋糕(HKD78)就以泰國玫瑰花茶底、茶葉等做成流心餡料,件有消化餅碎同雲呢拿雪糕,冰火交融嘅口感一流呀!鍾意玫瑰嘅話,可以配搭玫瑰飲品令味道更持續。

左邊嘅玫瑰泰奶茶(HKD48)嘅奶蓋軟綿薄身,唔會好膩。而香茅蝶豆花梳打(HKD48)幾清新醒神,啱點咗濃味菜式嘅朋友refresh味蕾。

 

Boticario
地址:尖沙咀廣東道 3-27號海港城港威商場 3樓 3303號 店
電話:2153 3730
營業時間:星期一至日:11:30-21:00

(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *