【粉色淡雪草莓下午茶 清新甜點配極鮮壽司】帝都酒店櫻田日本餐廳

早排帝都酒店櫻田日本餐廳先後推出咗靜岡蜜瓜同燕窩Tea Set, 而今次就以當造淡雪草莓配搭手握壽司創作淡雪草莓日式下午茶(HKD588/2位), 仲附送2杯手調製作嘅蒸餾咖啡抹茶牛奶添!想感受吓日本甜蜜風味,就要快啲約埋朋友去食喇!

下午茶有原粒日本淡雪草莓伴紅寶石朱古力醬、4款淡雪草莓甜食同4款精選極上壽司。大部分食物都以草莓做材料,製作出唔同口味嘅鹹甜點,真係花盡心思㗎!

先試淡雪草莓伴紅寶石朱古力醬,淡粉紅色嘅淡雪草莓食落口感爽甜清新;蘸上紅寶石朱古力醬,令到成粒草莓香氣提升之餘,仲多咗淡淡嘅奶香甜味。

甜食方面,綠茶蕨餅嘅外層顏色翠綠,入口柔軟滑順。當中嘅綠茶粉亦冇過多苦澀味,甜度啱啱好。甜而不膩嘅草莓忌廉卷入面包住鮮草莓果肉同奶油鮮忌廉,最頂仲有原粒草莓作點綴添。

呢個草莓白朱古力慕絲入口即融,加上豐盈嘅草莓同底層香脆薄片,口感同味道都夾得啱啱好呀!草莓水信玄餅外形晶瑩剔透,咬落爽口微甜,配埋草莓好睇又好食!

鹹食有清甜草莓入饌嘅草莓帆立貝軍艦壽司,帆立貝味道鮮甜而且肉質彈牙,加上甜甜嘅草莓果肉,令成個味道都充滿驚喜。而甘海老壽司有黑松露醬作點綴,食落有鮮甜蝦味之外,仲有陣陣嘅松露香呀!

鰻魚壽司以慢火炙燒封鎖肉汁,令表面有微微嘅焦香,肉質亦相當嫩口。柚子胡椒油甘魚壽司用咗風味獨特嘅柚子胡椒作簡單調味,以保留魚肉新鮮同細膩嘅口感,食出甘甜滋味。

下午茶會附送兩杯手調製作蒸餾咖啡抺茶鮮奶,亦可以用優惠價HKD198享用Clarence Hill汽酒一枝。

 

淡雪草莓日式下午茶
供應日期:即日起至2021年3月31 日
供應時間:星期六、日及公眾假期 15:00-16:00
價目:HKD588(兩位用) 

 

帝都酒店櫻田日本餐廳  
地址:沙田白鶴汀街八號帝都酒店3樓 櫻田日本餐廳
訂座電話:2694 3810
營業時間:星期一至日:12:00 – 22:00
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *