【尖沙咀歎金牌甜點大師經典糕餅 百年品牌糕餅×意式輕食】GIOVANNI PINA

 

自認係甜品控嘅你,一定唔可以錯過尖沙咀K11 Musea新開嘅意式甜品餐廳GIOVANNI PINA呀!呢個品牌由1920年創立,同品牌同名嘅第三代傳人Giovanni Pina喺1994年就獲得國際糕點獎金牌同「甜點大師」榮譽稱號。到2009年佢更獲選為全球100位最佳甜點大師,而意大利全國只有6人獲得呢個殊榮,即刻睇吓有咩特別啦!

餐廳有室內外位置,不過呢個中庭位就更加啱打卡喇。

雜錦全手工迷你酥皮撻(HKD128/一打)可以自選鮮果吉士撻、雜果仁撻、藍莓果醬撻、忌廉泡芙、迷你酥皮吉士卷同杏桃果醬撻做組合,不過圖中嘅招牌口味迷你酥皮吉士卷工序繁多,所以最多只可以揀兩件。呢款細細件都有144層酥皮,入口香酥輕柔易咬開,而入面每日鮮製嘅吉士醬滑甜軟棉兼滑身,絕對要試呀!

意式薩赫蛋糕(HKD52)係百年歐洲貴族經典蛋糕Sacher,不過呢度比傳統版減少牛油同糖分,同時用上坊間少見嘅白色冧酒。在口感上更輕盈細膩,香甜中帶有白蘭地嘅芳香。朱古力嘅味道濃厚,有濕潤感又唔會好漿口。

棋盤蛋糕 (HKD52)有5層組合,每層20%嘅黃金比例好考功夫㗎。其中深色嘅係chocolate custard,淺咖色就係hazelnut cream。入口有濃濃嘅榛子味,不過質感依然保持鬆軟有空氣感。

芝士控又點少得米蘭芝士餅 (HKD52)呢?呢款芝士味比較清香,同時帶有淡淡嘅檸檬味,食完冇平時嘅飽滯感。薄薄嘅餅底做得比較黏身,唔會一篤就碎。

呢度仲有其他輕食,意大利黑毛豬腩煙肉金槍魚子沙律(HKD148)撈埋自製醬汁之後味道鹹中帶酸幾醒胃,而且黑毛豬腩煙肉切成厚條狀,香脆又有咬口。配埋火箭菜、羽衣甘藍、小蕃茄、合核等蔬菜同果仁,用料足又唔覺得好邪惡。

即烤煙三文魚燒茄子水牛芝士香草包三文治配甜薯條(HKD138)好大份,女仔分分鐘可以share食。香草包有明顯嘅香草味,咬落算鬆軟。夾住滿滿嘅即烤煙三文魚、燒茄子、沙律菜等用料,啱晒鍾意健康飲食嘅女士。仲有炸到微脆嘅甜薯同無花果沙律,其實素嘅分量比肉多好多添。

帶子蘆筍意大利飯(HKD188)唔好睇佢細細份,女士係夠飽嘅。煎到表面少少焦香嘅帶子入面都係啱啱好熟,而且一啖係食唔晒㗎!意大利飯同creamy嘅醬汁煮埋一齊就幾清香軟滑。

呢度嘅咖啡(HKD32起)都係意大利知名咖啡牌CAFFE MILANI嘅出品,入口酸度適中,仲好甜心配上曲奇添。

 

GIOVANNI PINA
地址:尖沙咀梳士巴利道18號K11 Musea 217號舖
電話:2755 1123
營業時間:星期一至日:11:00-22:00

(餐廳及店舖會因應疫情調整營業時間)

You may also like...

Leave a Reply

Your email address will not be published. Required fields are marked *