【人氣手工啤登陸銅鑼灣 歎豬荽漢堡+龍蝦水煮蛋】The Madhouse CWB

The Madhouse Taproom進駐銅鑼灣,開咗名為The Madhouse CWB嘅分店,連帶環境同食物都闊落同有更多選擇。現時有近30款來自世界各地嘅手工啤,由酒精濃度ABV到代表苦味度數嘅IBU都有顯示。當然有選擇困難症嘅朋友可以搵店員推介,做埋Beer and Food Pairing都得啫。小編都試咗呢個服務,快啲睇埋落去就知係點喇!

今次以嘉年華嘅感覺設計餐廳,等大家嚟到有更relax嘅氛圍,由入門到走都可以開心輕鬆enjoy food。

一講飲酒就諗Happy Hour時段?不如追上外國人嘅腳步,日頭都飲返杯啦!呢度有12款Weekend Brunch,焗香蕉煙肉配窩夫(HKD98)係甜中帶鹹嘅款式,除咗窩夫仲有Yorkshire Pudding可以揀。配黑啤呢個選擇小編真係冇諗過,而且呢款IBU達70度同11%ABV,入口偏苦但中和食物嘅甜味,反而食晒成份都唔覺膩,不過冇飲開黑啤嘅朋友單點就未必接受到喇。

龍蝦麥特尼迪(HKD158)分別配上煙韌酸種麵包同鬆化炸饅頭,一次滿足你兩種口感!一碟有一隻波士頓龍蝦尾分量,爽口而鮮甜厚肉嘅滋味加埋水波蛋,俾人幸福嘅感覺。配上低酒精、酸甜帶果香嘅手工啤,成個感覺好清新,好啱周末做早午餐添。如果真係唔想配酒都有健康冰果茶(+HKD15)咖啡(+HKD15)熱養生茶(+HKD20)可以揀。

呢度都有唔同口味嘅多國菜㗎,而大部分肉類菜式配IPA手工啤都好夾。台式小食我不想滷力了滷水拼盤(HKD168)有齊雞腎、豬耳、雞翼同豆腐4款滷味,集爽口同滑身嘅質感於一身,滷汁偏鹹而入味,佐酒一流!

芫荽控必試正!豬荽(HKD138)漢堡!用蒸饅頭同炸饅頭做漢堡嘅上、下層,夾住大量炸芫荽同煙韌厚切嘅日式叉燒,一啖就有多重口感,又唔會好濃味而封喉。

焗手工啤啤雞(HKD328/2位起用)一切落去就有大量肉汁流出嚟,皮薄肉嫩唔多油。蘸埋有啤酒香嘅醬汁會令香氣更濃郁,但味道並冇偏鹹,反而帶有啤酒嘅微苦,食多幾件都得。

 

The Madhouse CWB
地址:灣禮頓道29號華懋禮頓廣場地下2號舖
電話:2891 1948
營業時間:星期一至日:11:00-22:00
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *