【東涌度假風新餐廳 地中海菜×手工Pizza】Cabana Breeze

Staycation都係想有輕旅行嘅感覺,但冇理由個個周末都Staycation㗎嘛。位於香港東涌世茂喜來登酒店入面嘅Cabana Breeze就幫緊你喇,酒店內庭開揚式設計,有別於平時喺室入用餐嘅「困獸鬥」感覺,望住藍天食嘢已經好寫意, 呢度仲歡迎主子們來埋愛寵一齊嚟添。咁呢間主打地中海海鮮菜嘅餐廳有咩好食?即刻睇埋落去啦!

餐廳室內外分別呈配寫意、華麗同熱情嘅感覺,就算打卡飲杯嘢都chill到唔捨得走。而曾經喺全球多間米芝蓮星級餐廳同豪華酒店全職嘅摩洛哥籍行政總廚Faycal El Moujahid,更加將對海鮮嘅熱愛融入多款地中海菜俾大家細味。

GRILLED OCTOPUS SALAD (HKD118)係熱盤上嘅烤章魚沙律,睇落好鹹香濃味?其實慢煮至柔軟再快烤嘅西班牙八爪魚配以蕃茄、黑橄欖醬、黑橄欖汁等醬料,反而香草味感覺比較突出。

Seafood Tower (HKD498/2p)包含5款海鮮,精選波士頓龍蝦、澳洲松葉蟹、新鮮生蠔、熟蝦同青口,其實「肉」量都唔少喎。你可以配香醋汁同檸檬角一齊享用,清新同醒胃口味一次試勻添。

嚟到一定要試埋手工Pizza,所有餅底都用上意大利"00"號小麥薄餅麵粉,加入酵母、鹽、糖等揉成鬆軟嘅麵糰,而且發酵48小時,放入燃木石窯爐烤焗後更加煙韌有嚼勁。CALZONE (HKD168)係香港少見嘅意大利傳統餸子薄餅,賣相夠晒吸引!入面包住新鮮蕃茄醬、熟火腿、蘑菇同水牛芝士做餡料,味道酸甜幾juicy。

想keep住海鮮菜主題的話,LOBSTER & CAVIAR (HKD248)就啱晒你喇。薄餅鋪上新鮮蕃茄醬同芝士後以近300℃烤焗約2分鐘,再放上龍蝦、魚子醬同新鮮香草,入口唔覺得好膩,反而面層有麵包嘅軟熟感,底層就煙韌有咬口。

雖然主打海鮮,但有石窯爐烤當然做埋烤肉啦!MAIALAE PORCHETTA (HKD268[精選] / HKD888[全份])係西餐較少見可以預訂全隻烤乳豬,2至3個月嘅法國乳豬重大約3至4公斤,加入茴香籽、迷迭香、檸檬皮、橄欖油、鹽、胡椒、蒜等慢烤約12小時,再用鴨油、橄欖油等慢煮,最後放在約330度石窯爐快烤約4小時,令乳豬皮變得香脆而肉嫩juicy,想預訂記得最少提早兩、三日落單喇。而每日售完即止嘅精選分量大約係全份嘅1/8,配上慢煮小茴香同Salsa Verde莎莎青醬,帶有豐富香草香味。

如果你係甜品控,千祈唔好錯過PINAPPLE TATIN (HKD88)。呢款菠蘿批嘅靈感源自Pina Colada雞尾酒,所以將菠蘿配上加入冧酒嘅蛋糕,入口甜中帶油香!之後再配上用肉桂、八角等煮製而成嘅菠蘿他他、粉紅胡椒、新鮮薄荷同帶有椰子粒粒嘅椰子雪糕一同享用。總廚就建議先食一口菠蘿冧酒蛋糕,然後嚐椰子雪糕,最後再配菠蘿他他,咁可以大大提升味道層次㗎。

CHURROS with CHOCOLATE MOUSSE (HKD78)係質感好鬆軟嘅西班牙油條,入面有啲似沙翁。雖然面層有砂糖同肉桂粉,但蘸埋凍嘅Nutella朱古力慕絲完成令人眼前一亮!

餐廳裝潢咁有特色,所以連雞尾酒酒杯都好特別。Maui Margarita (HKD115[左])混合墨西哥胡椒浸泡龍舌蘭酒、龍舌蘭蒸餾酒Mezcal、檸檬葉、青檸、粉紅西柚同菠蘿,入口都幾烈。Dark & Stormy Lantau (HKD115[右])就混合帶有五香層次嘅冧酒、Demerara糖粒、自家醬薑啤同Angostura 苦酒,甜味濃而不失酒香。

每位氈酒同冧酒愛好者,走之前記得等埋店員推「烈酒餐車」嚟揾你,為你送上一杯自家調製嘅Rum酒,而所用嘅Rum係自家用White Rum加八角、玉桂等香料浸調,帶有少許雲呢拿甜香。作為餐廳對到訪客人嘅少少心意,亦為成個用餐體驗畫上完美句號。

 

Cabana Breeze
地址:東涌怡東路9號T Bay,G12至G15舖
電話:2777 8980 / 2777 8982
營業時間:星期一至日:11:30-22:00
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *