【舊港式洋行火鍋新店 花系拼盤×汽泡打卡牆】香江花月

雖然依家晚市可以做到10點,但要一晚行街打卡再食飯都幾趕。佐敦新開嘅香江花月以50年代舊港式洋行裝潢為藍本,集懷舊電影感同科幻時光隧道於一身,連食物擺盤都充滿藝術感,喺度食一餐都有排玩呀!

門口俾人一種去入時光隧道嘅感覺,成個人都想靜落嚟咁。

大門房邊特別設計「汽泡時光隧道」房間俾大家打卡。

入到去無論係大廳、細房定大房都充滿電影感,亦帶俾大家relax慢活嘅氛圍添。

特色湯底之中,美人之選有玫瑰花入饌嘅牛乳玫瑰鍋(HKD168/鍋)以日本北海道全脂牛乳配上日本玫瑰烹煮,有濃郁牛乳香氣仲幾清甜,冇平時打邊爐嘅油膩感添。

[左] 矜貴之選金泊清酒海鮮鍋(HKD368/鍋)用日本清酒配上鮮蝦、蟹及蜆等時令海鮮。大廚以秘方爆炒配紐西蘭牛油、洋蔥同蒜頭等逼出海鮮嘅鮮味,再加入清酒湯底一齊熬製。[右] 惹味之選花雕胡椒豬肚鍋(HKD168/鍋)特別嚴選20年陳釀紹興花雕酒配中式藥膳;而以古法熬製胡椒豬肚湯喺春夏季飲用帶有健脾暖胃嘅功效,秋冬季則可以驅風散寒。

花月拼有安格斯牛肉、松阪和牛、牛黃喉、牛胸油、牛柏葉、豬頸肉、豬粉腸、羊肉片等部位。

打邊爐點都有啲肉,將肉片捲成花朵嘅香江拼(HKD788)以多個部位嘅牛肉組成,有牛柳粒、安格斯牛、牛白肉、牛腱、牛心椗、牛柏葉同牛脷等,啱晒「牛魔王」呀!而花月拼(HKD688)就有齊牛肉、豬肉同羊肉共11款部位,方便有選擇困難嘅人,配牛乳玫瑰鍋口感仲好甜滑添。

如果想點鴛鴦鍋(HKD118),有清湯、麻辣、芫荽同沙嗲4款普通口味,亦可以升級(+HKD30)配一款特色鍋,但雞同海鮮鍋就做唔到雙拼喇。

如果點麻辣鍋,咁一定要配串串火鍋料,製造四川風味呀!三款串串組合各有8-12款食材:
牛羊串串(HKD268)包括雪花一口牛、澳洲羊肉、滋味牛雜、手工牛丸、黑柏葉、白蘿蔔、鮮准山同冬瓜件。
豚肉串串(HKD268)包括穀飼黑豚肉、金沙青、蝴蝶腩、鮮豬雜、彈牙豬皮、午餐肉、南瓜件、冬瓜件、鮮冬菇。
海鮮串串(HKD298)包括鮑魚、海蝦、帶子、蟶子、沙爆魚肚、脆鯇、鮮白鱔皮、水魷魚多款時令新鮮海鮮同,以及土豆、珍珠筍同雞髀菇。

仲有其內外兼備嘅火鍋料都係不客錯過㗎:
左上 – 自家製三色墨魚丸(HKD78)分別以鹹蛋黃、黑松露、蟹籽自家手打,入口幾彈牙同滑嘟嘟,但有少少蓋過墨魚嘅鮮味。
右上 – 三色餃(HKD88)包含黑色嘅黑松露長腳蟹餃、橙色嘅芝士鮮菌餃同米黃色嘅野生松茸餃,仲係收到客人落單先即包,保持新鮮。淥起都幾大隻,仲啖啖肉。
左下 – 冬甩墨魚菓子(HKD78)好有咬口,因為用墨魚同蝦製成冬甩外形之外,仲加入杏仁同腰果!
右下 – 藝術蔬菜拼盤(HKD98)好似精心設計嘅盆栽,粗略數數都有8款蔬菜,食晒佢就可以排毒抗氧化啦!

打邊爐當然要飲啲嘢,餐廳特別精心炮製多款以鮮花做主題嘅打卡特飲。最後嘅鳳琉香(HKD68)加入自家製嘅菠蘿味糖漿配干薑水,再加上香味煙波喺杯頂,篤穿充係打卡一流嘅仙境效果!而左二嘅瑰洛月(HKD68)將洛神花玫瑰蘋果等材料製成糖漿同玫瑰形嘅紅色冰花,確保唔會因冰塊令味道變淡,酸中帶甜幾消滯喎。

 

香江花月
地址:佐敦道35號百誠大廈2樓
電話:2736 8368 / 6565 7888
營業時間:星期一至日:11:00-22:00
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *