【富小路副線歎頂級燒肉 A5黑毛和牛盛宴專人服務】焼肉而今 Yakiniku JIKON

去K11 Musea食得豪未必唔飽肚嘅!富小路副線燒肉店焼肉而今嘅頂級套餐,將東京過百年歷史和牛供應商日山畜產嘅A5黑毛和牛,以各種燒法同調味配搭;加上專人為你烤肉,帶俾你身心滿足嘅奢華體驗!

大廳位置嘅日式座位好闊落,私隱度都算高。

A5黑毛和牛壽喜燒定食(HKD290)

呢度嘅Lunch Set(HKD180-555),有A5和牛、澳洲和牛、赤雞肉、豚肉之外,亦有壽喜燒、吉列定食、烏冬定食等選擇。套餐亦配有前菜、沙律、茶碗蒸等6款配料,都相當豐富㗎。

而最入面會供應全店最豪嘅而今燒肉套餐(HKD1,280位/二人起),由女將野村寛美為你烤肉添。雖然話十點,但由多個和牛部位組成,其實唔只十款㗎,要預返用法國餐嘅時間慢慢歎。

成個套餐都用上日山畜產嘅A5黑毛和牛,為免大家食兩啖就膩,餐廳會附上自家製泡菜。味道幾清新爽口,亦唔會過濃影響食和牛嘅感覺。

先以煙燻和牛粒配魚子醬和牛他他配和牛壽司嘅鮮甜感喚醒味蕾,然後配有小杯清酒幫你洗走油膩感;其中和牛壽司以辣椒同松露醬俾你品嚐兩種感覺添。

燒肉配置之中,先嚟而今特選鹽燒和牛3。有彈牙厚切牛舌、以昆布鹽調味嘅爽口薄切牛舌,加上切到外形似扒嘅貝身肉(牛柳之一),入口油香十足好juicy㗎!

而今特選醬燒和牛1切配海膽和牛熱狗會按食材選用較瘦嘅和尚頭牛肉部位,將富小路やま岸招牌海贍菜式結合和牛燒肉,集鹹香、甜滑同鮮味於一身!

就算中間間場嘅沙律都用上爽口嘅法國冰菜,每個部分都做得好細緻!

夏多布里昂1切及和牛西冷兩個部位前者彈牙有油香,後者瘦少少,配甜酸嘅柚子醋令油嘅感覺平衡返。

再飲啖吸物(湯品)清一清,就可以歎下一道和牛菜式喇!

而今特選壽喜燒配松露都幾大壽肉,蛋汁同松露加埋一齊令香氣更加有層次,將肉包住飯一齊食又有別於平時嘅口感添。

最後以冷麵或和牛湯麵或和牛茶漬飯、細滑有豆香嘅而今甜品結尾。而成個套餐出現嘅湯汁都唔同,可見廚師對整個配餐嘅配搭都一絲不苟,真係呈現和食嘅精髓。

 

焼肉而今 Yakiniku JIKON
地址: 尖沙咀梳士巴利道18號Victoria Dockside K11 Musea6樓603號舖
電話:2868 0929
營業時間:星期一至日:12:00-23:00
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *